La Confederaziun metta a disposiziun 280 milliuns francs per la cultura per mitigiar las consequenzas da la pandemia. Gia il mars ha la regenza svizra decidì il pachet da mesiras, uss èsi cler, co ch'ils daners vegnan repartids.
100 milliuns duain esser per las interpresas cun nagina finamira da rendita e 25 milliuns francs èn previs per agid immediat per artistas ed artists. 145 milliuns francs stattan a disposiziun per indemnisar perditas e per las uniuns culturas laicas èn pronts 10 milliuns francs.
Producent da cultura: 196 francs per di
Era persunas activas en il champ cultural pon dumandar 196 francs per di sustegn. Sco basa vala la davosa taxaziun da la taglia federala directa e la cumprova d'esser en ina situaziun da crisa economica. Plinavant duain els sco era interpresas activas en il sectur da la cultura survegnir sustegn finanzial, sch'ina producziun vegn spustada u ditga giu. L'indemnisaziun da perdita duai dentant cuvrir maximalmain 80% dal donn finanzial.
Limità sin dus mais
Ils chantuns pon dentant be far ils emprims pajaments, sch'els han suttascrit la correspundenta cunvegna da prestaziun cun la Confederaziun. L'ordinaziun dal Cussegl federal vala retroactiv per ils 21 da mars, e quai per dus mais.
Betg profitar dals daners da sustegn pon dentant constructurs e vendiders d'instruments da musica, videotecas, discotecas, dancings e clubs da notg. Era biros d'architectura, labors da fotografia, bibliotecas sco er commerziants d'art na pon betg far diever da quests pajaments.
