Process cunter derschader - Procura publica pretenda praschun – Defensurs vulan acquittament
In anteriur derschader è stà davant dretgira perquai ch'el vegn inculpà d’avair violà e mulestà ina praticanta. Durant dus dis èn las persunas involvidas vegnidas a pled ed interrogadas. Ils pledoyers finals han cuzzà fin 21:15. Cun quai è il process a fin. La sentenzia vegn spetgada l'emna proxima.
Qua datti ina survista curta. Dapli detagls davart il cas actual e surtut dapli savida fundada vegn declerà giusut en quest artitgel.
Tgi è l’inculpà? Las medias che rapportan dal cas, han stuì s’obligar da betg numnar il num da l’inculpà – sco tar autras proceduras giudizialas era. Durant il malfatg è il derschader stà en uffizi tar la Dretgira administrativa dal Grischun. El è sa retratg suenter che la chaussa è vegnida a la glisch. I vala per el la presumziun d’innocenza.
Tgi è l’unfrenda? I sa tracta dad ina giuvna giurista che ha fatg in praticum en la Dretgira administrativa per suenter pudair absolver l’examen d’advocata.
Tge è la renfatscha? Ils 13 da december 2021 haja il derschader violà la praticanta, che aveva da lez temp 24 onns. Quai saja capità en la dretgira administrativa en il biro dal derschader. Da bell’entschatta haja la praticanta fatg cler ch’ella na veglia nagin contact sexual – tant cun dir sco era cun stuschar davent l’inculpà. Entras sia forza e dominanza corporala haja il derschader sfurzà ella ad acts sexuals. Uschia resumescha la Dretgira regiunala Plessur la renfatscha da la procura publica en la prevista sin il process. L’inculpà refusa las renfatschas. El conceda bain ch’i haja dà in contact sexual, ma omadus sajan stads perina.
La sentenzia duai vegnir tratga ils 8 da november.
Resumà curt e cumpact:
La Procura publica dal Grischun pretenda in chasti da 30 mais per il derschader inculpà, tranter auter pervia da violaziun e mulestas sexualas. L'advocata da l'anteriura praticanta pretenda indemnisaziuns. Tenor la Procura publica saja la versiun da la praticanta vardaivla, fertant che l'anteriur derschader n'haja betg fatg decleraziuns da vaglia.
Ils advocats da l’inculpà pretendan che l’inculpà duai vegnir declerà nunculpant. Els mettan en dumonda sche tut ils mussaments sajan sin maisa. Plinavant mettan els en dumonda la situaziun da la violaziun descritta da la praticanta. Els pretendan ch'ils custs dal process van sin donn a cust da la cassa dal stadi e da la praticanta.
La sentenzia duai vegnir tratga ils 8 da november. Per l'inculpà vala la presumziun d'innocenza.
05:34
video
Procura publica pretenda chasti da 30 mais per derschader inculpà
Or da Telesguard dals 01.11.2024.
laschar ir. Durada: 5 minutas 34 Secundas.
Il segund di: Las partidas tegnan lur pledoyers
La Procura publica dal Grischun è da l’avis che la praticanta saja vardaivla. Tut quai ch’ella haja ditg, fetschia segn. Ella haja savì raquintar da blers detagls e pudì descriver bain las situaziuns capitadas. La Procura publica pretenda perquai in chasti da 30 mais per l'inculpà, sis mais da quels duai el ir en praschun (pia in chasti nuncundiziunà):
da quels èn 24 mais pervia da la violaziun,
tschintg mais pervia da las mulestas sexualas,
in mais pervia da nunchapientscha (tud. «Uneinsichtigkeit»),
Vitiers vegn in chasti da 5'400 francs pervia da las smanatschas cunter la praticanta e ses partenari.
L'advocata da la praticanta pretenda indemnisaziuns per l'inabilitad da lavurar ed ils custs da terapia da la praticanta.
1 / 2
Legenda:
L'anteriur derschader inculpà avant la Dretgira regiunala Plessur.
Linda Graedel
2 / 2
Legenda:
La praticanta fa sia deposiziun davant dretgira.
Linda Graedel
Ils advocats da l’inculpà pretendan entant en emprima lingia che l’inculpà duai vegnir declerà nunculpant. Il pledoyer cuzza anc ed ils advocats mettan tranter auter en dumonda sche las cumprovas èn cumplettas. Sper quai pretendan els ch'ils custs dal process van sin donn a cust da la cassa dal stadi e da la praticanta.
Ina survista pli detagliada da las posiziuns
Avrir la boxSerrar la box
Il segund di da process era reservà per ils pledoyers. Quels han er cuzzà tut il di. Il derschader inculpà è stà l’entir di en sala, l’unfrenda presumabla ha tadlà en in'autra stanza via video.
Procura publica pretenda 30 mais
Cumenzà ha la Procura publica. Ella è da l’opiniun che l’inculpà duai survegnir in chasti da 30 mais, da quels 6 mais en praschun. La Procura publica è da l’avis che la praticanta saja vardaivla. Tut quai ch’ella haja dit, fetschia segn. Ella haja savì raquintar da blers detagls e pudì descriver bain las situaziuns capitadas – e quai sur pliras interrogaziuns. Quai na fiss betg stà pussibel, sch’i na fiss betg capità uschia.
Auter saja quai tar la persuna inculpada. Il derschader n’haja strusch raquintà detagls, saja stà fitg general e la qualitad da sias decleraziuns sajan bassas. L’inculpà pretenda ch’els hajan gì ina relaziun sexuala en enclegientscha. Perquai ch’el ha er ina partenaria fiss in’affera cun ina practicant insatge extraordinari ch’el stuess sa regurdar da dapli detagls. La Procura publica vegn a la conclusiun ch’il derschader inculpà na saja betg vardaivla.
Defensurs pretendan acquittament
Tut auter vesan quai ils advocats dal derschader inculpà. Per l’ina mettan els en dumonda sche tut las cumprovas sajan insumma sin maisa, cun quai che l’anteriura practicanta haja sez segirà ils chats cun l’inculpà e lura stizzà els. Perquai pudessa esser ch’ella ha stizzà chaussas che n’avessan betg cumprovà sia versiun.
Per l’autra mettan els en dumonda la situaziun da la violaziun sco che l’anteriura practicanta ha descrit ella. Quella na giaja betg si cun la situaziun e la mobiglia en il biro da l’anteriur derschader. Sper quai n’haja ella mai exprimì mals durant la violaziun ed i n’haja dà naginas blessuras. Plinavant n’hajan ins betg chattà spera ubain spida. Quai tut sustegnia la versiun da l’inculpà che pretenda ch’il contact sexual saja stà en enclegientscha, però ch’i n’haja betg dà ina penetraziun.
Replicas fin la saira tard
Il process ha cuzzà fin las 21:15 il venderdi saira. En emprema lingia perquai ch'ils advocats da l'inculpà han tegnì in fitg lung pledoyer (da las 12:45 fin las 19:30 cun pliras curtas pausas). Silsuenter han tant la Procura publica sco er l'advocata da l'anteriura practicanta dastgà prender posiziun e replicar sin il pledoyer. Quai han els era fatg, e mess en dumonda e curregì bler da quai ch'è vegnì ditg dals advocats da l'inculpà. Silsuenter han quels puspè survegnì il pled ed han puspè argumentà encunter quai ch'era vegnì ditg da las autras varts. Igl è stà in vi e nà giuridic, nua ch'igl è ì per blers detagls ed interpretaziuns.
Davos pled
Il davos pled ha l'inculpà survegnì - el è en emprima lingia sa perstgisà tar sia famiglia e ses amis per quai ch'è capità. El saja sa cuntegnì moralicamain ed eticamain fallà, n'haja dentant betg commess in malfatg. El haja adina pensà ch'il contact cun l'anteriura praticanta saja stà en enclegientscha. Sche quai na saja betg stà il cas, lura stettia el fitg mal. A la fin ha la derschadra annunzià che la sentenzia duai tratga ils 8 da november.
Resumaziun da l'emprim di da process
audio
Process cunter anteriur derschader – ina survista da l'emprim di
06:20 min, ord Novitads dals 31.10.2024.
Maletg: FMR
laschar ir. Durada: 6 minutas 20 Secundas.
L'emprim dals dus dis èn l'inculpà, la praticanta e perditgas vegnidas e pled ed interrogadas. La praticanta e presumabla unfrenda ha raquintà ch'i na giaja actualmain betg bain cun ella. Durant ses practicum hajan las mulestas cumenzà via chat, i saja spert vegnì malempernaivel. Sin dumonda ha la dunna lura stuì descriver fitg en detagl la violaziun che saja capitada ils 13 da december 2021. Silsuenter ha ella stuì respunder bleras ulteriuras dumondas da detagl puncto l'agen cumportament ed er il cumportament dal derschader.
06:23
video
L’emprim di dal process da violaziun hai dà las interrogaziuns
Or da Telesguard dals 31.10.2024.
laschar ir. Durada: 6 minutas 23 Secundas.
Il derschader inculpà è s'exprimì il tard suentermezdi. Quel ha discurri da patratgs da suicidi, da mo pli lavurar 50 pertschient e ch’el stoppia prender medicaments per la psicha. L’accusà ha snegà la violaziun ed era la mulesta sexuala, el e l’anteriura praticanta hajan gì insatge tranter in flirt ed in’affera. Els hajan era gì contacts corporals e sexuals – dentant ils 13 da december n’haja el betg violà la dunna, gnanc penetrà. Els hajan dentant gì contact sexual, ed ella saja era stada activa. La dretgira ha era vulì savair da l'um fitg blers detagls.
L'emprim di da process en detagl
Avrir la boxSerrar la box
Suenter ch’il process ha cumenzà cun intginas formalitads ed infurmaziuns davart l’andament dal process ha la dretgira decis, che tut las persunas duessan dastgar restar anonimas. Sin quai è lura l’emprima perditga vegnida interrogada, ina collavuratura da la dretgira. Il derschader inculpà era il schef da questa dunna. Ella ha pia lavurà ensemen cun l'anteriur derschader e la praticanta. L'interrogaziun è ida fitg en ils detagls – tranter auter èsi ì per la tschaina da Nadal planisada da la dretgira durant quest temp. Tut en tut è vegnì ora che la perditga haja mai udì u vis insatge d'ina relaziun sexuala tranter il derschader e la practicanta. Suenter l'interrogaziun ha il public stuì bandunar la sala – ed er l’inculpà ha stuì ir ora.
Ils derschaders sisum, praticantas e praticants giusut
Sin quai è l'anteriura praticanta e presumabla unfrenda vegnida interrogada. L’emprima dumonda che la derschadra ha fatg: Co vai cun Vus? Respundì ha ella ch'ella saja fitg stressada e fitg sut squitsch. Silsuenter èsi ì per sia sanadad psichica – i na giaja betg bain, ella saja en terapia dapi lura ed era adina puspè scritta malsauna. Silsuenter hai dà dumondas davart il praticum tar la dretgira che haja l'entschatta plaschì fitg bain. Lura hajan las mulestas cumenzà via chat, ed ella haja l'entschatta anc pensà che quai saja manegià legher. I saja dentant spert vegnì malempernaivel per ella.
L'anteriura praticanta declera lura ch'ella n'haja betg pli pudì durmir. Ella haja sin quai mussà ils chats a ses paternari sco er a ses geniturs. Tuts eran d’accord che quai na saja betg professiunal dal derschader. Tuttina haja ella mess en dumonda sasezza, sch'ella fetschia uss ord ina mustga in elefant. La ierarchia saja stada fitg clera tar la dretgira – ils derschaders sisum, praticantas e praticants giusut. Perquai haja ella er gì grond respect da l’inculpà. Sin dumonda ha la dunna lura stuì descriver fitg en detagl la violaziun che saja capitada ils 13 da december 2021. Silsuenter ha ella stuì respunder bleras ulteriuras dumondas da detagl puncto l'agen cumportament ed er il cumportament dal derschader.
Il partenari da l’anteriura praticanta ha era gì da s’exprimer avant dretgira. Per l’ina ha el fatg in plant accessoric, e per l’autra ha el survegnì ina brev da smanatscha da l’anteriur derschader – tuttina sco sia partenaria. Il partenari ha descrit a la dretgira il temp avant e suenter, ed era explicit il di da la violaziun presumabla. Entant viva il pèr en in auter chantun. Era pervia dal filz veglian els tegnair distanza dal chantun Grischun, ha il partenari ditg.
Finalmain hai tutgà l’anteriur derschader
Tard suentermezdi da l’emprim di da process ha la dretgira clamà l’inculpà. Quel ha discurrì fitg da bass, uschia ch’igl è stà grev d’al chapir. Sin la dumonda dals derschaders «Co vai» ha el ditg ch’el na stettia betg bain. Ed el ha menziunà patratgs da suicidi, da mo pli lavurar 50% e ch’el stoppia prender medicaments per la psica.
L’accusà ha snegà la violaziun ed era la mulesta sexuala, el e l’anteriura praticanta hajan gì insatge tranter in flirt ed in’affera. Els hajan era gì contacts corporals e sexuals – dentant ils 13 da december n’haja el betg violà la dunna, gnanc penetrà. Els hajan dentant gì contact sexual, ed ella saja era stada activa. La dretgira ha era vulì savair da l'um fitg blers detagls.
Quai è stà il stan da l’interrogaziun da l’anteriur derschader la gievgia saira vers las 6. La dretgira ha dentant anc cuntinuà il process la saira. Per l'inculpà vala la presumziun d'innocenza.
Dumondas e repostas en connex cun il cas
audio
Process cunter anteriur derschader – per tge vai?
05:53 min, ord Actualitad dals 30.10.2024.
Maletg: RTR
laschar ir. Durada: 5 minutas 53 Secundas.
La FMR ha mess ensemen las dumondas principalas che sa laschan respunder gia avant il process.
Tgi è l’inculpà? Las medias che rapportan dal cas, han stuì s’obligar da betg numnar il num da l’inculpà – sco tar autras proceduras giudizialas era. Durant il malfatg è il derschader stà en uffizi tar la Dretgira administrativa dal Grischun. El è sa retratg suenter che la chaussa è vegnida a la glisch. I vala per el la presumziun d’innocenza.
Tgi è l’unfrenda? I sa tracta dad ina giuvna giurista che ha fatg in praticum en la Dretgira administrativa per suenter pudair absolver l’examen d’advocata.
Tge è la renfatscha? Ils 13 da december 2021 haja il derschader violà la praticanta, che aveva da lez temp 24 onns. Quai saja capità en la dretgira administrativa en il biro dal derschader. Da bell’entschatta haja la praticanta fatg cler ch’ella na veglia nagin contact sexual – tant cun dir sco era cun stuschar davent l’inculpà. Entras sia forza e dominanza corporala haja il derschader sfurzà ella ad acts sexuals. Uschia resumescha la Dretgira regiunala Plessur la renfatscha da la procura publica en la prevista sin il process. L’inculpà refusa las renfatschas. El conceda bain ch’i haja dà in contact sexual, ma omadus sajan stads perina.
Violaziun u nizzegià dependenza? Empè d’ina violaziun – «eventualiter» sco ils giurists din – vegn en dumonda era in auter delict penal, numnadamain il nizzegiar ina situaziun da dependenza e sfurzar uschia ina persuna a sex. L’unfrenda haja temì che l’inculpà – cun sia posiziun e ses contacts tar politichers, autoritads ed advocats – pudess prender influenza sin sia carriera professiunala ed impedir quella, stat scrit en la prevista sin il process. En pli haja il derschader gia avant la violaziun mulestà pliras giadas la praticanta, tant en chats sco era corporalmain.
Pertge è l’ami da l’unfrenda era pertutgà? L’ami da l’unfrenda vegn era menziunà sco donnegià. Il settember 2023 hajan l’ami e la praticanta survegnì brevs anonimas da l’anteriur derschader. Lez haja smanatschà ch’i saja instradà ch’els dus na passian betg l’examen d’advocats dal Grischun.
È il process public? Gea. Mintga process penal è public danor process cunter giuvenils. Damai che gia las medias occupeschan var ventg sezs, hai be anc plaz per circa in tozzel aspectaturs u aspectaturas.
Co vegn l’unfrenda protegida durant il process? In process po retraumatisar ina unfrenda d’in delict sexual. Perquai prenda la dretgira pliras mesiras. Per l’ina vegn evità che l’inculpà e l’unfrenda s’inscuntrian durant il process. L’unfrenda po tadlar las tractativas, per exempel l’interrogaziun da l’inculpà, en ina stanza vischina. Il public sto plinavant bandunar la stanza, cura che l’unfrenda raquinta a la dretgira sia vista, tge ch’è capità.
Tge chasti pretenda la procura publica? Gliez n’è anc betg cler. Era l’act d’accusaziun, nua che la procura publica descriva en detagl ils delicts, n’è anc betg publitgà. Las medias survegnan invista pir ina mes’ura avant ch’il process cumenza. Il chasti che la procura publica pretenda, sto para esser pli bass che tschintg onns praschun. Pertge? Per fitg auts chastis dovri in gremi da tschintg derschaders. Per quest process èsi prevedì be in gremi da trais derschaders.
Chastis fin trais u diesch onns
Avrir la boxSerrar la box
Dapi in onn vala il dretg penal sexual revedì. Quel levgescha per part la cumprova per ina violaziun. I vala il principi «na è na». Gliez munta: Sch’ina persuna di u dat d’entellir ch’ella na vul nagin sex ed i vegn tuttina ad ina penetraziun, lura sa tracti d’ina violaziun.
Per valitar il cas da l’anteriur derschader e la praticanta valan però las veglias disposiziuns ch’eran en vigur il december 2021 cura ch’il delict presumà è capità. Tenor lez dretg è necessari che la violaziun è succedida sut forza u smanatscha u sut squitsch psichic.
Il rom penal è però il medem. Tant en il vegl sco en il nov dretg smanatschan tar violaziun chastis fin a diesch onns praschun. Per in chasti da passa tschintg onns duvrassi però in gremi da tschintg derschaders u derschadras. Per quest process è nominà be in gremi da trais. Il chasti pretendì da la procura publica na surpassa pia segir betg tschintg onns.
Sche la dretgira vegn a la conclusiun ch’i na saja capità nagina violaziun, mabain che l’inculpà haja nizzegià la situaziun da dependenza per sfurzar la praticanta a sex, vegn en dumonda in chasti fin trais onns praschun.
Tgi ha da truar? La derschadra Bettina Flütsch maina il process. La giurista ha studegià a Lucerna e tutga da preschent tar las trais derschadras extraordinarias che gidan a sminuir las pendenzas a la Dretgira Plessur. Ils derschaders assessurs èn Paul Schwendener – el è gia pensiunà e posseda ina furmaziun giuridica – e Hermi Saluz che n’è betg giurist.
Tgi defenda l’inculpà? Tanja Knodel è sia defensura. Areguard la revisiun dal dretg penal sexual chattan ins differentas intervistas cun l’advocata. Ella è mintgamai sa fatga ferma per «na è na» tar il delict da violaziun. Lezza varianta è en vigur dapi in onn.
Tgi è la procuratura publica e pertge vegn ella crititgada? Purtà accusaziun ha Corina Collenberg, la procuratura publica responsabla. Il portal «Inside Justiz» ha fatg enconuschent il cas avant dus onns ed ha crititgà las examinaziuns da la procura publica grischuna. Lezza haja per exempel tralaschà da confiscar il telefonin ed il computer da l’inculpà. Ils protocols da chat sin skype che documentassan, co ch’il derschader haja emnas a la lunga persequità la praticanta, na sajan betg vegnids segirads a moda ch’els valessan sco cumprova avant dretgira.
Process brisant e quatter egls
Avrir la boxSerrar la box
Ch’in derschader ha da cumparair avant dretgira, capita mo mintga quatter tempras. E ch’in derschader grischun vegn inculpà d’avair commess ina violaziun en ses lieu da lavur, leventa interess medial en l’entira Svizra. Il process cumenza la gievgia.
Violaziuns ed auters delicts sexuals succedan per il solit senza perditgas. Perquai èsi uschè difficil per ina dretgira da decider davart culpa u nunculpaivladad. Ina partida renfatscha sforz e violaziun, l’autra di ch’els sajan stads perina da far sex. En gliez reguard n’è il process che cumenza la gievgia a la Dretgira regiunala Plessur nagut spezial. Igl è in process davart in delict da quatter egls, nua ch’i manca in segund pèra egls che pudess dar a moda fidada perditga tge ch’è propi succedì.
Il cas ha però gia bittà autas undas medialas: l’inculpà è in anteriur derschader da la Dretgira administrativa. L’unfrenda è ina praticanta. Capitada è la violaziun presumabla en il biro dal – en il fratemp anteriur – derschader. Gist pervi dal squitsch ed interess medial, gist pervi da sia singularitad per il Grischun, daventi per la Dretgira regiunala Plessur anc pli difficultus da valitar il cas. Ella sto sa basar sin indizis e pasantar quant vardaivel ch’ils raquints da las partidas èn. E la dretgira na dastga betg sa laschar influenzar da la scandalisaziun gia capitada en gasettas, radio e televisiun.
