In anteriur derschader da la Dretgira administrativa grischuna sto sa responsar davant dretgira, tranter auter pervia da violaziun sexuala d'ina praticanta. La Procura publica grischuna ha entant terminà l'inquisiziun ed accusà l'anteriur derschader da 48 onns tar la dretgira regiunala Plessur a Cuira. Quai ha confermà la procura publica sin dumonda dad RSI.
L'inquisiziun era vegnida lantschada suenter la denunzia da l'unfrenda probabla. I vegn spetgà che la dretgira fixescha en curt in termin per il process. La praticanta aveva 24 onns cura ch'ella ha rapportà quai il 2021 cura ch'il derschader e la praticanta hajan lavurà ensemen tar la dretgira administrativa.
Suenter las enconuschientschas d’enfin uss sa tractia d’ina escalaziun, cumenzada da frasas fitg explicitas fin al punct culminant d’ina violaziun sexuala che saja para succedida la saira dals 13 da december avant trais onns. Sco mussament per la relaziun tranter las duas persunas dettia fastizs da DNA da l’um en ils secturs intims da la dunna giuvna. Rapports che l’accusà na snega era betg, ma el accentuescha ch’i haja adina dà il consentiment da la praticanta. El è pia persvas ch’el n’haja betg commess in delict. Per l’anteriur derschader administrativ dal Grischun vala la presumziun d’innocenza.
