Il december passà è vegnì enconuschent ch'i dettia inquisiziuns cunter in derschader administrativ grischun. El duai avair violà ina praticanta a la dretgira. Las inquisiziuns sajan uss bain per gronda part a fin, hai num da la procura publica sin dumonda dal Schurnal regiunal da SRF. Dentant avant ch’ins termineschia uffizialmain la procedura, veglian ins anc sclerir tge dretgira che fiss responsabla per cas ch’i vegniss tar in process.
In cass nunusità
Quai è plitost in'excepziun. Normalmain èsi uschia che mintgamai la dretgira regiunala, nua ch’il delict supponì è succedì, tracta il cas. En il cas dal anteriur derschader administrativ fiss quai la dretgira regiunala Plessur a Cuira.
In anteriur derschader emploià da la dretgira administrativa a Cuira che vegniss giuditgà dad in gremi da derschaders da la dretgira regiunala a Cuira – quai pudess sut circumstanzas esser delicat, di Maurus Eckert:
Quella proximitad pussaivla pudess far la parita ch'il gremi da derschaders fiss partischant. Sche quai è propi il cas, sto la dretgira chantunala sclerir.
Vegn la dretgira chantunala a la conclusiun che la dretgira regiunala Plessur na saja betg responsabla per quest cas, lura vegniss in'autra da las 10 dretgiras regiunalas definidas, per cas ch’i dess in process.
Uschè u uschia, sch'il cas vegn insumma tractà davant dretgira n’è anc betg cler – per l'um vala la presumziun d'innocenza.
Procedura da surveglianza è annullada
Gia il schaner è vegnì enconuschent che la procedura da surveglianza cunter il derschader administrativ è vegnida annullada. Quai ha decis la cumissiun per giustia e segirezza dal Cussegl grond. Cunquai ch'il derschader haja demissiunà per la fin da l'onn saja la procedura daventada obsoleta, uschia l'argument. Quella n'haja betg gì ina finamira penala – i fiss ì per giuditgar las rinfatschas tenor il dretg da surveglianza.
La cumissiun haja stuì proceder cun premura ed observar tut ils dretgs e tut las garanzias processualas dal derschader pertutgà. Per l'inquisiziun penala da las renfatschas saja vinavant responsabla la procura publica, hai num vinavant.
