Enstagl da trais cuzza la sessiun da december questa giada quatter dis. Quai pervia da ch'i dat trais gronds temas nua ch'i vegn er spetgà debattas intensivas.. Deputadas e deputads s'occupan e debatteschan davart suandantas fatschentas:
Preventiv e plan da finanzas – sbassar taglia
Sbassar taglias è gia daditg tema en Grischun, adina puspè pretendan fracziuns e parlamentaris da sbassar la taglia chantunala. En il rom dal preventiv 2024 discutescha il Cussegl grond davart ina soluziun concreta. Cusseglier guvernativ responsabel Martin Bühler propona al parlament da sbassar il pe da taglia per 5% a partir dal 2024 per persunas natiralas.
35 milliuns per la digitalisaziun
Segunda fatschenta gronda che vegn en debatta è la strategia per in'administrativa digitala. L'idea da quella è da digitalisar l'administraziun uschia che ils servetschs administrativs dal chantun stattan a disposiziun a populaziun ed economia sin via digitala. Per far questa transfurmaziun uschè svelt sco pussibel ha la regenza deliberà la strategia e planisescha mesiras cun custs da 35 milliuns francs, sper quai duain bun 45 plazzas vegnir stgaffidas. Al Cussegl grond propona la regenza quest credit da 35 milliuns francs.
Structura da las vischnancas
In ulteriur rapport ch'il Cussegl grond tracta è quel davart las structuras communalas. Quel mussa co il chantun Grischun è sa mida ils ultims dus decennis. Actualmain dumbra il Grischun 101 vischnancas, l'onn 2000 eri anc var 200 vischnancas. Tenor la regenza sajan ils resultats da fusiuns positivs e la refurma da territori realisada cun success. Il rapport vegn er a la conclusiun che las finanzas da vischnancas sajan bunas. Sch'il Cussegl grond va d'accord cun quai, sa mussa lura en la discussiun. Er la strategia futura vegn preschentada.
Elecziuns, dumondas ed incumbensas
Sper quai vegnan sco adina sin maisa dumondas ed incumbensas da differentas spartas. Il Cussegl grond ha er d'eleger las autoritads da giustia per la perioda d'uffizi da 2025-2028. Quai èn lura las autoritads per la nova dretgira suprema ch'è la fusiun da la Dretgira chantunala e la Dretgira administrativa dal Grischun.