Ils atlets e las atletas en il sport d'elita èn enconuschents per ir fin als cunfins. Elisa Gasparin è ida sur quels cunfins ora.
Cun las preparativas per ils Gieus olimpics a Sotschi il 2014 ha tar la biatleta da Puntraschigna cumenzà in cumbat che ha cuzzà bun 1,5 onns. Cunquai ch'ella saveva che la cursa a Sotschi è fitg dira – e ch'ins haja a curta vista in avantatg sch'ins è pli leva – haja ella cumenzà e mangiar pli e pli pauc. A l'entschatta ha ella smess cun las dultscharias, lura cun ils idrats carbonics e lura cun adina dapli.
I saja stà in gieu cun il fieu. A l'entschatta ha ella gì gronds success, malgrà mangiar bler memia pauc. A Sotschi ha ella gudagnà in diplom, ed er uschiglio ha ella fatg buns resultats. Perquai n'ha ella era betg tadlà sin ils cussegls dals medis e trenaders. Elisa Gasparin di ch'ella haja gì il sentiment d'avair tut sut controlla e ch'ella possia senza problems puspè entschaiver a mangiar normal. Simplamain betg anc en quest mument nua ch'i funcziuna gist tut uschè bain.
Quel success è dentant stà engianus. Quai ha ella stuì realisar durant in camp da trenament l'atun 2015. Là ha ses corp capitulà. Ella era enorm stancla uschia che ses trenader ha dà ad ella ina pausa da trais dis. Durant quels trais dis haja ella mo durmì. Suenter è'la turnada a chasa nua ch'ella è las proximas emas era mo stada en il letg. Sinaquai ha ella plaunet puspè empruvà da trenar, dentant senza success.
Perquai è ella «scappada». In mais ha ella passentà a Mexico lunsch davent dal mund da biatlon. Cun la distanza è plaunet turnada la relaziun normala cun il mangiar. Enavos en Svizra hai anc cuzzà in pèr ulteriurs mais.
Oz è la biatleta da 32 onns dentant loscha da pudair dir ch'ella ha pudì surmuntar relativamain spert quella episoda da sia vita. Ella haja oz ina relaziun normala cun il mangiar. Ella taidlia simplamain sin ses corp. Tuttina di ella, ch'ella haja duvrà 3-4 onns per puspè cuntanscher il medem nivel sportiv ch'ella aveva avant quell'episoda en sia vita. En ina carriera sco sportista saja quai enorm bler temp ch'ella haja pers.
E per gidar che giuvnas atletas na ston oz betg pli far in'experientscha sumeglianta discurra Elisa Gasparin gugent davart sia experientscha ed il pretsch ch'ella ha stuì pajar per quella.
