Presidi da Cuira - Urs Marti: «En 12 onns hai jau fatg passa 18'000 sesidas»

Il 2012 è Urs Marti vegnì elegì sco president. Quest success s’ha suenter anc repetì dus giadas – fin l’onn 2024 è el stà il presidi da la citad da Cuira. El haja dumbrà grosso modo sias uras da sesidas è vegn sin passa 18’000 uras. Uss, cura ch'i va vers la fin da questa era haja el in egl che crida. Suenter vegn el dentant ad avair in egl che ri. El di ch'i saja impurtant che glieud giuvna surpigliaa questas posiziuns e ch'i dat nov vent e novas forzas. Era sche ses successur Hans Martin Meuli è intgins onns pli vegl che el, manegia el cun ina tschegnada.

Cifras fitg nairas

Cura ch’el ha surpiglià il post e las finanzas da Cuira eran las cifras cotschnas. El sco fiduziari ha pass per pass scrit cifras nairas.

En ses ultim quint per la citad ha Urs Marti preschentà in plus da 12 milliuns. En ina citad dovri dentant ina gestiun permanenta. Era sche las finanzas èn actualmain saunas na possian ins betg sa pusar enavos. Perquai ha el questa stad preschentà in plan da spargn cun 101 mesiras. Da quest n'aveva la populaziun dentant nagin gust ed ha demonstrà . Er il parlament da Cuira n'era betg persvadì ed ha refusà quest plan. Urs Marti saja dentant cuntent ch’el ha pledentà quai e mess las chartas sin maisa.

Questa proposta haja el manegià a moda preventiva, ch’ins stoppia spargnar cura ch'i na fa anc betg mal. Dentant na saja betg reussì da surpurtar quest messadi. Ina segunda sconfitta è stada la votaziun dal barat da parcellas da City West. Guardond enavos è quest resultat capità ord svaris e perquai che la suprastanza n'era betg fitta. Ina nunreelecziun saja segn avunda che la situaziun n'è betg buna, ed uschia manca lura era la fidanza.

Uschia lascha Urs Marti enavos ses post sco president cun in bun sentiment. Sco proxim va el enavos en sia lavur sco fiduziari. Ses ultim di uffizial en chasa communala ha el ils 31 da december 2024.