Tgi che visita ils proxims dis ina da las ustarias premiadas po sa legrar d'in spectacul per ils egls. Uschia per exempel en l'ustaria Argo datiers da la staziun da Cuira. Collavuraturas e collavuraturs han decorà il local cun agid da las persunas cun in impediment. Tut tenor la paraula: Alice en il mund magic.
Uschia n'han ni il giat sdrimà cun la bucca lada ni la rasulauna che fima schischa dastgà mancar. Cura ch'ins entra en l'ustaria han ins il sentiment d'esser en ina tauna plitost stgira che vegn qua e là dentant illuminada da glischs blauas, oranschas e melnas.
Pli pesanta è l’atmosfera en la Bierhalle en la citad veglia. Caricaturas da mafiosi malegiadas sezzas pendan vi da las paraids ensemen cun massa notas da dollars. Ins auda musica in zic suspectusa or da films da mafia ed ins savura e vesa il fim da cigaras.
Il motto: Khur-A-Nostra: Nus essan tuts in zic mafiosi. Cun quai manegia l’artist Antonio Piccaluga ch'ha creà la decoraziun che nus tuts faschain mintgatant plaschairs in a l’auter u dain in u l’auter bun tip:
Decenta è la decoraziun percunter en l’ustaria Loe, in zic ordvart la citad da Cuira. Tenor il model da la mascra veneziana han las clientas ed ils clients, persunas cun in impediment psichic, creà lur atgna mascra. «50 giadas auter» è il motto da l’ustaria.
E sco finiziun da la saira è la giuria che consista dad amaturs ed amaturas da tschaiver e represchentants da las medias vegnida beneventada en in mund superfizial. «I’m a Barbie Girl» tuna or dals autpledaders da la Confetti-Bar, gist sper la via principala che maina tras Cuira. Dapertut pinc e gronda traglischur ed era il persunal da service è sa vestgì sco Barbie e Ken.
Quest onn èn be quatter ustarias sa participadas a la premiaziun d'ustarias. Avant intgins onns era quai bleras dapli, di Urban Räber, in dals suprastants da l'Uniun da tschaiver Cuira. El manegia che blers ustiers ed ustieras n'hajan ozendi simplamain betg pli la veglia, l'engaschi ed il temp da decorar lur locals sin tala moda. Quai saja donn, ma els veglian mantegnair la premiaziun. Quella tutgia – sco il tschaiver – tar Cuira.
Gist tuttina quantas ustarias ch'han laschà valità lur decoraziun, la finala datti mintg'onn trais emprims plazs. Quest onn è quai stà l'ustaria Arco, la Bierhalle e la Confetti-Bar. Tuttas dastgan pender si e preschentar a lur giasts la plachetta da tschaiver 2024.
