La plattafurma «eBau» è en funcziun – quai munta che dumondas da construcziun en il chantun Grischun pon uss er vegnir inoltradas ed elavuradas sin via digitala. Quai ha communitgà la regenza. La finamira saja da simplifitgar las dumondas da construcziun per tut las parts involvidas.
Tschertas vischnancas èn gia sa colliadas cun la plattafurma digitala dapi ch'ella è vegnida lantschada l'entschatta avrigl. Fin l’atun possian tenor la communicaziun da la regenza tut las vischnancas interessadas duvrar la plattafurma.
La procedura electronica duai vegnir introducida en l'entir chantun en trais etappas: l'avrigl, il zercladur ed il settember 2024 vegnan mintgamai connectadas var 20 fin 30 vischnancas.