Ch'i dovra vinavant sforzs per digitalisar ils servetschs en l'administraziun dal chantun è il Cussegl grond stà perina. La dumonda è stada quant grond ch'il schlantsch e las investiziuns per digitalisar l'administraziun duain esser. La finala ha la proposta da la regenza survegnì il sustegn, da metter a disposiziun in credit da 35 milliuns francs per ils proxims tschintg onns e stgaffir 45,6 novas plazzas. Las plazzas datti cunzunt en l'uffizi d'informatica.
Las mesiras èn previsas per ils onns 2024 fin 2028. Enfin lura vul il chantun dar a tut tgi che dovra in access uschè simpel sco pussaivel, e nua giavischà a servetschs. Quai pon esser process per lubientschas, certificats, u er ina plattafurma da barat digitala.
PPS avess gì gugent dapli
Dapli gas, daners e persunal per realisar la tranfurmaziun digitala avess la fracziun da la Partida populara grischuna gì. Ils votums da Jan Koch han bain magari survegnì sustegn da deputads da la PLD u era da la PS, la finala han las propostas da la regenza dentant gì la maioritad.
