In aspect central ch'ha giugà ina gronda rolla ils ultims onns è la midada da structura da bains purils. Quai è dad ina vart la grondezza da las purarias ma era tge animals che vegnan tegnids u er tge plantas che vegnan cultivadas. Ma era adina dapli bains purils survegnan structuras d'affars. Butiettas da puraria che vendan agens products èn vegnidas fitg popularas. Quai ha tenor Peter Küchler er da far cun la refurma agrara dal 1992. Quella ha pretais che puras e purs ston vegnir creativs e s’adattar al martgà. E quai saja era capità. Adina dapli puras elavuran agens products enavant sin l'agen bain. La plivalur resta uschè dapli tar il pur sez e na va betg enavant ad affars ch'elavurar products da l'agricultura. Quels n'han natiralmain betg tant gust, ma Peter Küchler manegia ch'i saja la dretga via. Natiralmain è da resguardar las atgnas capacitads e far quai che funcziuna per il agen affar il meglier. Ma ina tscherta strategia dovri.
L'energia e las ideas da giuvnas puras e purs per sviluppar l’agricultura èn in mintga cas d’enturn. Malgrà quai datti en media mintg'onn 2% damain bains purils. Pli baud eran quai anc passa 7'000 bains, ussa sun quai sut 2'000 en tut il chantun. Ils motivs èn differents. Quai sa esser ch'i mancan ils raps u che las famiglias n'èn betg bunas da vegnir d’accord.
Ina autra problematica èn bains che tegnan nursas u chauras. Quels han grev da surviver. Ma in sasez èn precis quels impurtants per la tgira da la cuntrada. Quests animals dattan blera lavur, per exempel cun mulscher. Ma engaschar persunal che sustegna cun questas lavurs n'è en Svizra betg favuraivel. In auter aspect è che l'animal na vegn betg nizzegiada avunda. Latg da chauras per exempel as lascha vender bain, ma la charn dals ansiels betg propi.
Il cuntrari è quai cun tegnair giaglinas. Quai è en congual in toc pli bunmartgà e la dumonda per charn svizra è gronda.
Ins na vegn betg davent dal maletg ch'è gia influenzà da generaziuns, ch'in vair pur ha vatgas e nagin muvel pitschen.
Era l’agricultura è part da l’industrialisaziun, dapli effizienza ed ina producziun bain planisada. Quai lascha forsa dumandar sch'i va en direcziun fabrica dad animals. Ma per il directur Peter Küchler na periclitescha la utilisaziun da dapli mecanissems d’industria betg il bainstar dals animals. E quant fitg ch'in bain puril e industrialisà e fitg different, sto mintgin far ina atgna opiniun.
Jau crai era ch'i dat ina massa nunsavida u gronds pregiudizis ch'ins stuess finalmain eliminar.
Per l'avegnir e Peter Küchler da l’opiniun ch'in pensar pli cumplessiv, ir sur ils cunfins da l'agricultura e collavurar cun differentas scienzas è ina buna via.
Or da l'archiv: