Savens vegnan purarias dadas enavant en famiglia. Pia in figl u ina figlia surpiglia il manaschi. Uschia è quai er tar Gian Beeli da Sagogn, Adrian Cabalzar dad Andiast e Jan Viletta da Guarda. Tuts trais han fatg in emprendissadi da pur ed han uss finì la scolaziun da mainafatschenta agricul.
Gian Beeli maina gia il manaschi da la famiglia a Sagogn
Cun el al timun hai dà ina midada centrala. El ha midà da la rassa da vatgas brinas sin la rassa Holstein, vatgas nairas. Mulschì vegn dentant anc vinavant sin il manaschi dals Beelis a Sagogn. Midà la rassa ha Gian Beeli perquai che la prestaziun da las vatgas Holstein saja pli gronda ad ellas hajan gia adina plaschì ad el. Uschigliò maina el vinavant pli u mains il manaschi uschia sco daqua – il pavlar ha el dentant intensivà. Pli grondas discussiuns n'haja anc betg dà sin il manaschi dapi ch'el è al timun. E tuttina; sch'el vegnia cun ina proposta per insatge nov dettia mintgatant in commentari critic. Mo sche la proposta vegnia er dad autras varts, lura vegnian quellas tuttina acceptadas.
Jau crai che jau ma sto anc cumprovar in zic sco manadar da la puraria.
Adrian Cabalzar surpiglia prxim onn il manaschi ad Andiast
Enfin avant curt era la vendita directa ina da las pitgas dal manaschi dals Cabalzars ad Andiast. Cun quai ch'ins avess stuì far investiziuns pli grondas che na fissan betg stadas en relaziun cun la vendita ha la famiglia decis da chalar cun la vendita directa. Ussa saja perquai da s'orientar da nov tgi che fa tge. Durant la scolaziun sco mainafatschenta agricul ha Adrian Cabalzar vesì bler pli detaglià co e cum ch'ins maina in puresser ed el constatescha: il manaschi, sco quai ch'ils geniturs han tschentà si, funcziuneschia super. Midadas da princip fatschian perquai actualmain nagin senn e lura saja da gaurdar pass per pass. Resalvas ch'i pudess dar conflicts pli gronds cun la midada da generaziun ha el naginas.
Bab ed jau pudain discussuinar libramain in cun l'auter. Ed el è er avert per novas ideas.
Jan Viletta da Guarda vegn in di a surpigliar la puraria
I saja grev da dir tge midadas ch'el vegnia a far cura ch'el surpiglia la puraria da famiglia. L'entschatta vegnia el a manar vinavant il manaschi sco da qua, e guardar pass per pass tge midadas che fan senn. Era sche nagin veglia quai, in u l'auter conflict na possian ins probabel betg evitar, quai saja uman e tutgia vitiers. El emprovia dentat da sviar quels uschè bain sco pussaivel.
Mia finamira è da guardar che nus sa chapin bain in cun l'auter.
Or da l'archiv:
