Da quest resultat profitescha er il chantun Grischun: El survegn 103,7 milliuns francs da la banca chantunala. E las investidras ed ils investiders survegnan er quest onn ina dividenda da 47,50 francs per scrit da participaziun. Era las prognosas per l’onn current sajan positivas. Perquai quinta la BCG cun in gudogn da 210 fin 230milliuns francs.
President Fanconi è cuntent cun la bilantscha
Ins haja gì l’entschatta da l’onn spetgas pli bassas, tranter auter pervia dal sviulup dals tschains. Ussa saja el surstà a moda postiva, uschia ha ditg cun in surrir il president da la banca Peter Fanconi. I saja ina cumprova che la banca possia era adina puspè cumpensar situaziuns difficilas e ch'ins saja ussa bunamain sin il nivel da l'onn da record dal 2023. Quai n'avessan Peter Fanconi e ses collegas betg pensà al cumenzament da l'onn. Perquai saja quai natiralmain stupent.
Ils ultims onns hai mintgamai dà gudogns da record. Ed il gudogn dal 2024 è quasi uschè aut sco il gudogn da record da l’onn avant. Prest 230 milliuns francs. Profitescha la populaziun avunda da quai? U ha la banca la prioritad da far adina dapli gudogn?
Na, quai è adina in pasar giu. Ina maximaziun dal gudogn na stat betg en il center, mabain cuntinuitad.
Peter Fanconi manegia che la populaziun protiteschia en differentas modas. D'ina vart da la rait da filialas localas, che autras bancas n'hajan betg. Plinavant profiteschia ord perspectiva finanziala, d'ina vart investuras ed inversturs grischuns, per exempel ils blers acziunaris ed acziunarias da scrits da participaziun che profiteschian da la dividenda. Ma betg mo, er indirectamain profiteschia la populaziun.
Nus pajain al chantun dividendas da passa 100 milliuns. E quai va natiralmain puspè a favur dal singul burgais e burgaisa. En il Grischun èn quai passa 500 francs per abitant ed abitanta. Quai è unic en Svizra. La contribuziun al singul burgais è substanzialmain gronda.
E la Banca chantunala Grischuna fetschia er fitg bler en connex cun sustegnair, per exempel projects ed occurrenzas culturalas, sportivas u d'utilitad publica. Quai saja lur incarica sco banca. Els sajan qua sco banca per abitantas ed abitants dal chantun. E perquai saja quai bel, da sustegnair occurenzas da sport, sco il HCD u occurenzas culturalas ed instituziuns. Per part instituziuns ch’i dess probabel gnanc pli senza sustegn da la GKB, uschia ses avis.
E co statti cun la clientella ch'ha in conto, pudess ins betg dar a quella megliers tschains, sche la banca fa tant gudogn?
Quai empruvain nus natiralmain da far. Nus ans muvain en in ambient dal martgà. Nus na pudain betg offrir auters tschains che quels che la Banca naziunala prescriva. Qua vali simplamain d'esser fair e da communitgar a moda transparenta.
Che radund 70% da la populaziun grischuna saja clientella da la GKB mussia che la banca fetschia para bler endretg, manegia il president partent, Peter Fanconi, che banduna la banca la fin fanadur – anticipadamain. Atgnamaintg fiss sia perioda d'uffizi ida enfin il mars 2026. Sco motiv per sia partenza anticipada numa el il process strategic. Per ses successur Heinz Huber saja impurtant da cumenzar gia il 2025, perquai ch'i saja impurtant per in president da banca da pudair furmar la nova strategia, che valia lura a partir dal 2026 per quatter onns.
La finiziun anticipada da Peter Fanconi n’haja da far nagut cun la «causa René Benko». Avant in temp era Peter Fanconi en las lingias grassas pervia d’in credit da 60 milliuns francs che la GKB aveva concedì da lezzas uras a la gruppa Signa da René Benko.
La tematica è terminada. Quai avain nus gea er examinà ed i ha dà nagin squitsch. Anzi, jau hai offrì da restar trais mais pli ditg, perquai che Heinz Huber n'è betg anc liber pervia da sia anteriura obligaziun.
E guardond enavos sin ses temp sco president da banca, ils ultims 11 onns, manegia Peter Fanconi, ch'el pensà d'esser enconuschent sco «in che prenda per mauns e fa». Las chaussas ch'el haja vulì realisar durant ses temp d'uffizi haja el pudì far. Uss restia anc intgins mais enfin che ses successur cumenza, nua ch’el stettia plain elan vidlonder.
