Per tge vai? - Nov center da furmaziun per la protecziun civila

Il bajetg existent per la scolaziun e la lavur da la protecziun civila è var 50 onns vegl. El na correspunda betg pli als basegns d'ozendi. La substanza dal bajetg è nauscha ed il chantun stuess investir bler per mantegnair e duvrar el vinavant a moda segira. Scleriments han mussà ch’igl è meglier e pli bunmartgà da stgarpar giu il bajetg existent a Meiersboda e da construir daspera in nov. Il center d'instrucziun da la protecziun civila sa chatta a l'ur da la citad da Cuira, sin territori communal da Churwalden. 

Stgars 19 milliuns francs per nov center

Cun ina concurrenza d’architectura ha la regenza chattà ina soluziun. Ils custs per l'edifizi nov importan stgars 19 milliuns francs.

L'edifizi planisà prevesa trais plauns. La chasa cuntegna tranter auter locals da scolaziun, in'aula ed ina cantina. En il plaun sutteran sa chatta sper tschalers e stanzas supplementaras er in tschaler da protecziun cun 200 plazs. La gronda part vegn construida or da lain ed auters materials persistents. La finamira era da construir ina chasa da netto nulla emissiuns da gas da serra. Aspects sco la circulabladad, in microclima optimà ed in'accumulaziun d'energia èn era vegnids integrads en la planisaziun. Sin il tetg èn ils elements da fotovoltaica concepids en moda maximala ed han ina prestaziun da var 100'000 kilowatt uras l'onn – 67% da quai che l'edifizi dovra mintg'onn.

Per la protecziun civila e sias organisaziuns partenarias vegnan uschia stgaffidas infrastructuras che pon vegnir utilisadas a moda flexibla per in'instrucziun effizienta. Plinavant po la chasa era servir al stab directiv chantunal en cas d'urgenza. Ina bun'infrastructura saja era la basa per che la protecziun civila possia accumplir sias incumbensas. Quai è surtut relevant, perquai ch'els vegnan en futur probabel pli savens ad esser en acziun – surtut pervia da dapli bovas ed auas grondas sco consequenza da la midada dal clima.

Nagina cuntravusch

Cuntravuschs na datti quasi naginas. Il Cussegl grond ha approvà la primavaira senza cuntravuschs il credit per il project. Era tut las partidas han recumandà da dir Gea al nov center da scolaziun per la protecziun civila. L'argument principal: La protecziun civila dovria in'infrastructura moderna per esser pronta per cas urgents.

Sche la populaziun accepta il nov center, èsi previs da cumenzar cun las lavurs da construcziun la primavaira 2025. Sche tut va lura tenor plan duai il nov center da scolaziun ir en funcziun la stad 2027. Pir lura vegn l'edifizi vegl stgarpà giu.