Cun ina concurrenza haja il chantun tschertgà in project persistent cun in'architectura d'auta qualitad, scriva la regenza. Sis teams da planisaders èn s'occupads da la planisaziun d'in nov center d'instrucziun per la protecziun civila a Meiersboda, sin il territori communal da Churwalden. Els han prendì en vista la finamira da netto nulla emissiuns da gas cun effect da serra. Aspects sco la circulabladad, in microclima optimà, ina producziun d'electricitad solara ed in'accumulaziun d'energia hai medemamain gì num d'integrar en la planisaziun.
In edifizi nov empè da sanar dal tut
Il nov center d'instrucziun Meiersboda cun in sectur d'alimentaziun, in per l'instrucziun ed in d'alloschi duai remplazzar l'edifizi da scolaziun e d'alloschi actual, construì ils onns 1975/76. Per motivs economics, da manaschi e da persistenza dovria – suenter in temp da manaschi da stgars 50 onns – in edifizi nov da substituziun, scriva la regenza. L'analisa da la valur d'utilisaziun sco er calculaziuns da CO2 e da persistenza hajan mussà ch'i saja d'avantatg da remplazzar l'edifizi actual atras in nov edifizi en il medem lieu empè da far ina sanaziun totala.
Cun il nov center d'instrucziun cumplettescha il chantun l'areal existent a Meiersboda. Quel cumpiglia er anc il stabiliment d'exercizi inaugurà avant pauc temp, ina halla da deposit e d'instrucziun, ed in lavuratori.
