Las pendicularas ston probabel avair pazienza fin il davos da matg per savair sch’ins po lura propi avrir l’entschatta zercladur.
Igl è inacceptabel che nus n’avain nagina segirtad per planisar.
Ins stoppia engaschar e scolar persunal e far revisiuns avant che avrir, di il president da las pendicularas grischunas. Il Cussegl federal n’haja para betg chapì ch’ins na possia betg avrir il manaschi entaifer paucs dis.
Nagin na cumpra in abo.
Senz’auter fissi stà pussaivel dad avrir las pendicularas cun las medemas mesiras da protecziun che valian era tar il traffic public encunter corona. I dovria segirezza da planisaziun.
Pli ditg che l’intschertezza duria, dapli sperditas ch’ins stoppia prender en cumpra. Il mender: Nagin na cumpria da preschent abunaments annuals. Ils davos onns hajan blers clients cumprà gia la primavaira u la stad abunaments. Entras la sperdita tar la prevendita manchian gia uss daners per la cassa d’enviern.
Data e daners
300 milliuns francs hajan las pendicularas en Svizra pers enfin il davos d’avrigl suenter ch’ellas hajan stuì serrar il mars dad in di sin l’auter, di Martin Hug. Plinavant sajan var 10'000 collavuraturs senza lavur u en lavur curta.
Perquai spetga il president da las pendicularas grischunas il suandant:
- Il Cussegl federal sto dir uschè spert sco pussaivel cura che las pendicularas pon avrir.
- La Confederaziun sto conceder agid finanzial direct per las pendicularas – betg mo credits per surmuntar la crisa da corona.
