Bunamain trais quarts dals da Lon èn ids ad eleger il 2019. Cun quai è la vischnanca sisum la Muntogna da Schons sin plaz in da tut las vischnancas grischunas. La participaziun en tut il Grischun era tar 42,9%. A Lon, ch'è entant fusiunà cun Donat, Maton e Casti-Vargistagn, èn percunter ids 73,2% a l'urna.
Ils da Lon èn gia adina stads fitg interessads en la politica. Nus essan paucs e mintg'opiniun quinta.
En general paran las Sutsilvanas ed ils Sutsilvans d'ir gugent a l'urna. Sin plaz dus da la participaziun dal 2019 era numnadamain Casti-Vargistagn. RTR è stà a Lon per chattar ora pertge che la participaziun è uschè auta. Tenor l'anteriur president communal dal vitg cun var 50 abitantas ed abitantas haja quai era da far cun il fatg che mintga vusch quintia sch'ins saja be paucs.
Schluein flop da las vischnancas rumantschas
Tut auter guardi ora a Schluein. Il vitg sursilvan ha gì la participaziun la pli bassa dal territori rumantsch cun 35%. Marcant: Las vischinas ed ils vischins da Falera ha gì la set meglra participaziun dal Grischun. Sco ch'ils da Schluein han declerà tar la visita da RTR saja questa tematica enconuschenta ad els.
Quai è fitg schlet, ma per mai nagina surpraisa. Cun nus vai forsa memia bain.
Tge che dat en egl: Era tar tut las autras elecziuns u votaziuns è la participaziun a Schluein adina marcantamain pli bassa che la media grischuna.
Participaziun bassa er en la Mesolcina, la Mantogna va a l'urna
Entant che bunamain trais quarts dals da Lon èn ids ad eleger il 2019 eran quai be in quart a Cama en la Mesolcina. En general para la motivaziun d'ir a l'urna – cun la grond'excepziun da Buseno – plitost bassa en la Mesolcina e la Val Calanca. Gist set da las 10 vischnancas cun la participaziun la pli bassa dal chantun èn en questa regiun. Auter sin la Mantogna/Heinzenberg, la participaziun è sumeglianta sco quella da la Muntogna da Schons: Tschappina, Urmein, Flerden u Masagn èn gista tuttas en ils top 10 da la participaziun.
Sch'ils da Schluein na van puspè betg propi a l'urna e sche l'interess dals da Lon e da la Muntogna da Schons resta grond sa mussa lura ils 22 d'october. Tut quai e dapli sin: rtr.ch/elecziuns
