Albert Gabriel da l'Uffizi chantunal da sanadad ha spitgà che las premias da cassas da malsauns vegnan cun in plum pli charas. El na saveva mo betg cura. Dentant ch'ellas creschian saja stà cler.
Las premias èn ils ultims dus onns betg creschidas perquai ch'il Cussegl federal ha pretendì da las cassas da bajegiar giu reservas. Ils custs èn però creschids perquai che dapli persunas han retratg prestaziun sin il sectur da sanadad.
Uss è il culm da reservas bajegià giu e las persunas segiradas ston puspè avrir sez la bursa.
Differenzas tranter ils chantuns
En il Grischun duain las premias crescher per 8,1%, quai ch'è suenter il Tessin cun 9,2% il pli aut resultat. En auters chantuns sco per exempel en Glaruna creschan ellas be per 1 %. Quai almain tenor in studi da la firma da cussagliaziun Accenture.
En Grischun avain nus premias sut la media, ed uschia è l'augment procentual cleramein pli grond che tar chantuns che pajan premias sur la media.
Ubain formulà in zic auter: En il chantun Giura per exempel van las persunas pli savens tar il medi, uschia che las premias èn pli autas. En il Grischun van las persunas in zic pli pauc che la media Svizra tar il medi, uschia che las premias èn plitost bassas. Pli bassa la premia è pli aut l'augment procentual sche persunas fan tuttenina diever da dapli purschidas medicinalas. E quai han Grischunas e Grischuns fatg l'ultim onn.
Ils secturs ch'èn creschids
Albert Gabriel po schizunt er numnar exact tge secturs ch'èn vegnids nizzegiads dapli: «Quai èn apotecas, chasas da vegls ubain er la cumpart ambulanta da l'ospital». Cun corona haja quai dentant da far nagut, la pandemia è registrada en in quint separà.
