La recepziun d'urgenza, las prestaziuns da dialisa e chemoterapia restan avertas senza interrupziun. Dentant èn las salas d'operaziun serradas dals 23 da december 2022 fin ils 3 da schaner 2023. A partir dal cumenzament da l'onn duain tut las purschidas lura ir en funcziun, ils 9 da schaner duai lura il manaschi ordinari en l'ospital cumenzar.
Tscherta cuntinuitad è dada
Il cussegl dal chantun da Son Gagl aveva approvà la vendita da l'ospital Walenstadt la stad 2022. Da las 231 plazzas po l'anteriur persunal tegnair 154. L'Ospital dal chantun Grischun occupa ulteriuras 31 plazzas cun agen persunal.
Il chantun Son Gagl sustegna il manaschi d'urgenza da 24 uras cun 1 milliun francs per onn. Vinavant posseda il chantun Son Gagl il dretg da cumprar l'immobiglia sco emprim. En cas d'ina vendita tras l'Ospital chantunal Grischun dastga il chantun prender il gudogn per sasez.