Open Air Rheinwald
Quest open air ha cumenzà, venderdi e cuzza fin dumengia. In dals headliners è Baba Shrimps. Els spetgan radund 900 visitaders e visitadras. Sco Gioanna Meuli, responsabla per la communicaziun dal Open air Rheinwald di, saja ella cuntenta cun la prevendita. Blers vegnian però er a la cassa da saira.
Els èn da buna speranza ch'i dettia in open air plain buns muments e buna cumpagnia cun buna musica.
Open Air Safiental
En la Val Stussavgia cumenza l'open air gia proxima fin d'emna. Las preparaziuns han entschiet gia avant duas emnas. Intginas chaussas laschan els durant l'onn al lieu. Il tetg da la bar ed il tetg da la tribuna èn gia construids. Tut il rest è anc da far. L'eveniment è amez la natira.
Tenor Morris Buchli, president da l'uniun da l'Open Air Safiental èn els bain en il temp cun las lavurs. La sfida è dentant da construir tut ora en il guaud.
Per quai duvrain nus gidanters e gidantras cun buna savida co far quai.
Els na spetgan betg blera prevendita. Per els è quai secundar. Els quintan cun radund 500 visitaders e visitadras e fin uss èn els da buna speranza che tantas persunas vegnian.
Open Air Malans
Las cifras da la prevendita sajan circa tuttina sco l'onn passà, di Alexandra Kelly, responsabla per marketing da l'open air. A Malans cumenzan las festivitads l'entschatta avust. Fin lura, dettia dentant anc bler da far.
Nus stuain adattar il terren uschia ch'i dat or d'in prà in open air.
Anc trais emnas, ma els cumenzan cun las preparaziuns gia proxima fin d'emna. Durant il prim d'avust na lessian els betg lavurar. Quai è il motiv, daco che els cumenzan gia ina emna avant cun las preparaziuns.