Tscherts han gia gì lieu – auters stattan anc avant porta. La stad da festivals ha cumenzà. Tar tscherts na para la prevendita dentant betg dad esser uschè buna sco auters onns.
Nus vendin mintga di biligets. Dentant betg tants sco era gia. Nus n'essan betg uschè cuntents co ch'i gira. Ma nus avain era dumandà auters en la scena ed i para da stagnar en l'entira Svizra.
Il pli grond openair dal Grischun il Openair Val Lumnezia era avant la pandemia vendì ora pliras giadas. Tenor Norbert Cavegn sajan quels temps sa midads suenter la pandemia. Las raschuns pudessan esser differentas tenor el. La generaziun giuvna n'haja betg pudì visitar ils emprims onns suenter la scola ils openairs pervia da la pandemia, tut è vegnì pli char, l'aura n'era anc betg uschè optimala ed il giavisch dals giuvens e las giuvnas da restar flexibels e decider pir la davosa minuta saja creschì. Quest svilup persequiteschan era auters.
Quai è simplamain la nova realitad. Da propi dir tge che fa grev da vender bigliets ordavant è grev da dir.
In dals festivals che para d'avair success cun la prevendita è il Gurtenfestival a Berna. Gia pliras categorias da tickets èn vendì ora. Ils organisaturs scrivan dentant sin dumonda dentant era che surtut bigliets be per in di na giran betg pli uschè bain. Il motiv pussaivel saja era là il giavisch dals visitaders e las visitadras da decider a curta vista e da restar flexibels.
Tge che gira tar l'openair Lumnezia fitg bain, perfin meglier che auters onns, saja la tschertga da voluntaris e voluntarias. Là hajan ins gia chattà avunda persunas che vulan s'engaschar durant la festa.
