In mantun sutgas stat en retschas, e tut la glieud che sesa sin quellas, guarda en la medema direcziun – tar ina taila gronda cun si il pled «BIONIK», in pignol da Nadal dasperas ed il zoolog Flurin Camenisch davanttiers, cun in microfon vi da l'ureglia.
Bionica – quai è il tema dal quart referat da quest onn en il rom «NATURsPUR» da Flurin Camenisch, che ha mintga giada lieu en la sala B12 sper il Museum da la natira. Il zoolog entschaiva il referat cun declerar l'emprim il pled bionica. «Quai è in'istorgia simpla», di el. «Ins ha simplamain unì ils dus pleds biologia e tecnica – ed or da quai è naschì il pled bionica.»
Per declerar pli exact la bionica, mussa Flurin Camenisch numerus maletgs e curts videos – da delfins, plantas, pinguins, flurs e toppas da giats. L'exempel il pli enconuschent da la bionica saja la serradira Klett, di el. Questa tecnica han ils umans copià da la planta «Klette».
Era las nudaglias, che nus tirain en per sfunsar pli svelt, avain nus copià da las raunas e da las andas.
Ils referats da Flurin Camenisch èn fatgs per uffants – la gronda part da la glieud che sesa en la sala n'èn dentant betg uffants, mabain creschids. Quai n'era betg ses plan cura ch'el è vegnì sin l'idea da far quests referats. Atgnamain vuleva el crear ina purschida per uffants, per declerar ad els la biologia, ma el ha spert sentì che quai format plascha er als creschids.
Ma el possia chapir bain l'interess, di el. En ses referats na stoppian ins betg temair ch'i vegnia cumplitgà ubain ch'el mussia ina statistica che nagin na chapescha. El vuless esser uschè chapaivel, che la glieud giuvna fin nov onns chapeschia il tema.
Igl ha blers geniturs ch'èn vegnids l'emprim cun lur uffants – e cura ch'ils uffants èn vegnids pli vegls e na vulevan betg pli vegnir als referats, èn ils geniturs tuttina anc vegnids.
Durant 45 minutas declera Flurin Camenisch differents exempels da la bionica e nua ch'ins chatta els en il mintgadi. L'inspiraziun da la natira po ir fin en la robotica, declara el – in exempel è in roboter cun otg chommas, che po siglir e schizunt ruclar sco ina culla, per chattar persunas sparidas. Quest roboter è vegnì inspirà d'in filien dal desert, che siglia sur il sablun.
Flurin Camenisch tscherna mintgamai sez ils temas davart quels ch'el fa in referat. Sia finamira saja da render chapibel temas ch'èn impurtants ad el per uffants. «Sche tuts chapeschan quai che jau less dir, lura sun jau cuntent», di Flurin Camenisch. «Ed ils auditurs e las audituras speranza era.»
Or da l'archiv: Super Bio Hero
