Stgilats èn animals che s'adattan fitg bain, perquai pon els viver en guauds cun grondas surfatschas sco er en parcs e citads. La gronda part dal temp passentan els en tschimas, nua ch'els sa movan en l'autezza en moda leva e segira.
Exposiziun speziala
Il Museum da la natira dal Grischun preschenta in'exposiziun speziala sur dal stgilat. L'exposiziun è vegnida fatga oriundamain dal museum da la natira da Winterthur.
Stgilats n'èn betg periclitads e n'èn er betg animals rars en Svizra. Tuttina èn els animals impurtants per l'ecosistem ed els èn in tema captivant per in'exposiziun. Stgilats èn en tscherts lieus uschè domestics, ch'els maglian mintgatant or dal maun dals umans. Dentant passentan els mo ina pitschna part da lur vita en la vischinanza dal terren. Il pli savens èn els en las tschimas dals bostgs.
Il stgilat è in animal enconuschent, ma da l'autra vart datti bler che la gronda part dals carstgauns na sa betg sur dad els.
En las curunas da las plantas fabritgeschan els era lur gnieus, or da mistgel ed or da bastuns. Il museum ha reconstruì tals gnieus che sumeglian in pau ad in ov. En quests gnieus pon las visitadras ed ils visitaders entrar en la chasa d'in stgilat ed experientar il mund tras ils egls da quest animal. In'ulteriura maniera co che visitadras e visitaders pon vesair la vita dals stgilats è tras ils egliers oranschs. Stgilats vesan numnadamain auter che nus umans – els vesan lur ambient oransch.
Sper questas parts interactivas datti bler auter per scuvrir. Tenor Flurin Camenisch, zoolog e pedagog da museum, èsi impurtant per el e per il Museum da la natira dal grischun da sensibilisar la glieud per l'ambient ed ils stgilats.
En il rom da l'exposiziun speziala porscha il museum er purschidas spezialas. In da quels è in'excursiun sin la senda da stgilats a Lai u ina spassegiada tar la platta cotschna a Cuira. Il Museum da la natira dal Grischun porscha er referats da Flurin Camenisch e guidas tras il museum da la natira.
L'exposiziun speziala dura dals 14. da mars fin ils 25 d'avust.
