A chaschun dal giubileum vul il museum preschentar en in'exposiziun speziala 150 objects sur tut ils decennis e tuttas spartas or. Uschia pon visitadras e visitaders bain spetgar cun in u l'auter exponat ch'ha passa 100 onns. Finamira n'è dentant betg mo da preschentar differents exponats, mabain er da render visibel l'istorgia e las activitads dal museum durant ils ultims onns.
Nus vulain er mussar tge ch'ans faschain ed avain fatg durant ils ultims decennis en il museum.
Sper l'exposiziun speziala spetgan dentant er ulteriuras attracziuns, sco per exempel referats, excursiuns e scolaziuns. Uschia vegni a dar il zercladur in concert sut il motto «carnaval dals animals», en il rendez-vous sur mezdi èn previs differents referats davart experiments botanics al Calanda e curtins natirals, ed a chaschun da la «natira la saira» èn planisadas differentas visitas guidadas che tractan exponats da las exposiziuns permanentas.
Bilantscha positiva per il 2021
Il 2021 ha il Museum da la natira dal Grischun dastgà beneventar passa 27'000 visitadras e visitaders. Quai èn bain 3'000 pli pauc che l'onn avant, tuttina cuntentan las cifras.
Jau sun fitg cuntent cun quest onn.
E quai, malgrà ch'ins haja stuì serrar l'entschatta 2021 dus mais pervia da la pandemia. L'interess per il Museum da la natira saja anc adina fitg grond. En ses 12 onns en uffizi n'ha Rehsteiner anc mai gì tants visitaders e visitadras en il museum sco il fanadur da l'onn passà.