MFK – la reportascha - Il vegl Daihatsu sut la marella da l'expert

Tgi che ha gugent ses auto, porta quel regularmein a la MFK u ... sto plitost far questa controlla obligatorica tar il chantun. Ma tge capita atgnamain, sch'il stgazi sin quatter rodas vegn controllà fin sin l'ultima gnerva? Conrad Capeder è in da quests experts che ha exact 25 minutas temp – per prender sut la marella in auto suenter l'auter. In job che va sin la minuta, tut è fixà.

La scursaniziun MFK è bain enconuschenta

In termin da la Controlla da vehichels a motor (MFK) chaschuna gnervusitad tar blers possessurs e possessuras d’autos. Uschia er questa giada: In vegl Daihatsu vegn prendì sut la marella precisamain.

Il focus èn ils suspectus usitads: ruina, glischs, frains ed ulteriurs puncts relevants per la segirezza. Surtut tar autos pli vegls sco quest Daihatsu po la ruina daventar spert in problem. Era qua sa mussi: mancanzas existan, la luna dal possessur vegn adina pli precara. Vegn ses auto anc ina giada tras la controlla u smanatscha il tema «betg subsister»? El stat dentant luc.

La MFK è in termin nunevitabel per tut las possessuras e per tut ils possessurs d’autos. Ella garantescha che mo vehichels segirs dal traffic èn sin via. Gist tar ils autos ch’èn vegls è il resultat savens intschert, perquai che surdiever e ruina pon ins cun ils onns strusch evitar.

Conrad Capeder controllescha en ina rutina usitada, ma per il possessur vai per tut. 25 minutas plain speranza. A la fin èsi cler, sch’il Daihatsu dastga charrar vinavant u sch’igl è da far reparaturas per far vegnir el puspè fit per la via.

Era il tuning è in tema

Il tuning è in tema impurtant tar talas controllas. Blers automobilists laschan modifitgar lur vehichel, igl è decisiv che las parts sajan admissiblas. «I vala la paina d'investir pli gugent dapli daners en parts dad auta qualitad admessas, enstagl da sa basar sin products favuraivels da plattafurmas sco Temu», di Conrad Capeder. Quellas pon chaschunar spert problems tar la MFK. Uschia evitesch'ins da far lavurs posteriuras nunnecessarias e procura che l'auto resta segir e legal.

Or da l'archiv: