Cun questas cifras è la manadra da la campagna da vaccinaziuns cunter il coronavirus en il Grischun cuntenta. Doortje Engel remartga, ch’ins haja sper las 13’368 vaccinaziuns da booster era pudì far 1’329 emprimas vaccinaziuns.
Da prolungar il center da pop-up saja dentant betg stà pussibel, cunquai ch’il bajetg vegn spazzà il schaner. Persuenter vegni a dar en tut ils centers da vaccinar en il Grischun la pussaivladad da laschar vaccinar senza termin. Plinavant vegnian ils temps d’avertura en ils lieus da vaccinar tar l’ospital da la crusch e l’ospital chantunal prolungads.
Grischun cun bunas quotas da vaccinaziun
Cumpareglià cun la media svizra ed uschia cun ils auters chantuns, èn ins tar il chantun Grischun cuntent cun las quotas da vaccinar. Tant tar las vaccinaziuns da basa sco era surtut tar il booster, èn las cifras procentualas dal Grischun sur la media svizra.
La manadra da la campagna da virolar dal chantun spera plinavant dad anc pudair motivar la gruppa da persunas tranter 50 e 70 onns da laschar vaccinar. En questa gruppa sajan 8’000 enfin 9’000 persunas betg vaccinadas. Sin las staziuns intensivas sajan actualmain 9 da 10 persunas betg vaccinadas e tutgan tar questa gruppa da vegliadetgna.
