La stad passada è la situaziun en Val Schons stada fitg tendida, quai suenter ch'ils lufs dal triep dal Beverin han attatgà e mazzà vatgas sin duas alps. Sin il pli tard lura hai cumenzà a buglir tar ils purs pertutgads. Els han lura fatg squitsch tar il chantun d'agir. Sinaquai hai dà ils 14 da fanadur ina sesida da crisa tranter exponents dal chantun e da l'Uffizi federal d'ambient (BAFU), nua ch'igl è vegnì decidì che dus lufs dal triep dastgan vegnir sajettads. En ina conferma a scrit ha il BAFU lura communitgà in'emna pli tard al chantun, ch'el possia ubain sajettar immediat dus lufs giuvens dal triep, ubain immediat in giuven e l'atun lura il mastgel problematic M92. Pir l'atun, davent dal november, perquai ch'el è in bab-luf e la lescha federala prescriva quai uschia.
Il chantun po en il rom dal contingent da sajettar – dentant er prevesair la schluppetada dal bab M92 enstagl d'in luf giuven.
Il chantun è sa decidì per l'opziun da sajettar immediat dus lufs giuvens. La pussaivladad da sajettar M92 n'ha el mai communitgà. Tenor il cusseglier guvernativ responsabel Mario Cavigelli na saja quai stada nagina tactica davostiers.
Ristg da betg pudair sajettar M92
Cun sa decider per l'opziun da sajettar immediat dus lufs giuvens, ha il chantun bain reducì il squitsch en Val Schons. El è dentant er ì en il privel da betg pudair sajettar l'atun M92, cunquai ch'il contingent è gia cuntanschì. Il dumber da lufs che pon vegnir sajettads, dependa numnadamain dal dumber da luffins novnaschids. Maximalmain la mesadad da quest dumber po vegnir regulà. Pia, sch'igl ha dà quatter luffins, lura pon dus lufs giuvens vegnir sajettads. La stad n'era dentant anc betg enconuschent quants luffins ch'igl ha dà. Ins ha mo vis che la luffa tezza. Uschia che questa lubientscha dal BAFU era gia extraordinaria.
Il BAFU ha decidì tenor ina nova pratica, enfin uss stuevan ins spetgar enfin che la cumprova da luffins è sin maisa. Perquai eran nus fitg leds da pudair sajettar dus lufs senza questa conferma.
Pir la fin d'avust ha lura in chatschader pudì observar set chagniels, uschia ch'il contingent per sajettar lufs è puspè creschì per in luf – per M92. Dentant er lu n'ha il chantun betg communitgà, el ha fin il cumenzament d'october empruvà da confermar ufficialmain quest dumber. Quai n'è dentant betg gartegià, uschia ch'il chantun è stà garant per quai chatschader ed ha survegnì la lubientscha dal BAFU da sajettar M92. Quai è lura era gartegià il november. Per il chantun è uschia tut ì si, el ha pudì sajettar la stad ils dus lufs giuvens per prender or squitsch. E l'atun ha el er pudì sajettar M92 che chaschuna gia dapi onns problems.
WWF ed Uniun purila per ina giada dal medem avis
Questa strategia da betg communitgar chaschuna dentant er critica. Il president da l'Uniun purila grischuna Thomas Roffler è da l'avis, ch'i fiss stà meglier da communitgar pli transparent.
Jau sun adina per ina communicaziun averta. La populaziun ha il dretg sin ina communicaziun averta e transparenta.
Ed Anita Mazzetta che maina il WWF Grischun dat en la medema crena sco Thomas Roffler. Lur organisaziun d'ambient saja vegnida infurmada davart las duas opziuns, ed hajan er communitgà ch'els fissian da principi d'accord sche M92 vegniss sajettà. Els han perquai er tegnì bain en egl tge ch'il chantun fa. Perquai ch'er Mazzetta ha vis il privel che M92 po tut tenor gnanc vegnir sajettà, perquai ch'il contingent è gia cuntaschì.
Nus avain gia la stad vis che quai è in ristg. Sch'i na dat betg ulteriurs pitschens, lura è il contingent duvrà si. Nus avessan lura guardà precisamain tar la proxima lubientscha. Il chantun è uschia naturalmain ì en in ristg.
Il WWF sco er l'Uniun purila avessan pia giavischà ina communicaziun pli transaparenta dal chantun. Cun communitgar avertamain avess il chantun tenor els pudì prender or anc dapli squitsch, che mo cun schluppettar ils dus lufs giuvens.
