D'avair gì in nausch decurs da Covid-19 n'è gnanc ina premissa per survegnir «Long Covid». Blers pertutgads èn schizunt guarids a chasa da la malsogna. E tuttina: Era suenter pli che trais mais han tschertins - senz'auter glieud ch'è avant la malsogna stada sauna, fitta ed activa – anc adina da cumbatter cun differents sintoms sco per exempel stancladad, difficultads da respirar u problems cognitivs. Long Covid (u per part era numnà «Post-Covid-19») pertutga tenor l'Uffizi federal da sanadad publica enturn 20% da las persunas ch'èn s'infectadas cun il coronavirus.
Las glistas da spetga per in tractament da Long Covid èn lungas. Uschia era en il spital Waid a Turitg, nua che Gieri Maissen lavura sco internist en in team interdisciplinar cun plirs medis e spezialistas – sco per exempel da la ergoterapia, la pneumologia, la neuropsicologia u la fisioterapia. Ils pazients e las pazientas vegnan tramess via il medi u la media da chasa tar els. Gieri Maissen examinescha sinaquai il pazient u la pazienta e definescha lura il tractament fitg individual.
Il pled clav tar il tractament da Long Covid: Il management d'energia. Perquai che sch'ina persuna cun Long Covid fa da memia – lura poi capitar detg svelt ch'i dat in uschenumnà «crash». Vul dir: Suenter in sforz (fisic u era cognitiv) sa senta la persuna malsauna e sto ir a letg. Quai po schizunt anc capitar suenter plirs mais sche la persuna sa senta ensasez gia bler meglier e vul - suenter ina lunga pausa sfurzada - puspè dar tut en sia vita da mintgadi. Quai – sco era il fatg, ch'ins sa anc adina uschè pauc davart quella nova malsogna – saja magari in detg frust, di Gieri Maissen. E perquai emprovan el e ses team simplamain da far tut quai che va, per che lur pazientas e pazients sa revegnan uschè bain ed uschè spert sco pussaivel. I dovria dentant ina massa pazienza.