Il secretari general novelegì Markus Solinger vegn oriundamain da Scuol, ma viva actualmain a Maur en il chantun Turitg. L'um da 55 onns è econom, fin ussa è el stà il manader dal marketing e da la scolaziun da l'Associaziun svizra da l'industria da gas. En la Rumantschia n'è el betg anc fitg enconuschent.
Suprastanza satisfatga
Solinger haja la savida necessaria per manar in'operativa en in ambient cumplex, sias cumpetenzas s'accordian fitg bain cun ils champs d'acziun che la Lia stoppia elavurar en il futur, din las co-presidentas da la Lia Rumantscha Urezza Famos e Gianna Luzio en ina communicaziun.
La suprastanza da la Lia Rumantscha saja satisfatga da pudair preschentar ina persuna versada en divers champs sco nov manader operativ. Markus Solinger vegnia da l'economia cun in accent sin marketing ed informatica ed è fitg motivà da promover il rumantsch en connex cun il svilup e la communicaziun digitala. Er la situaziun linguistica en il Grischun, ma er en la diaspora enconuschia el bain, uschia la co-presidenta Gianna Luzio vinavant.
Intensivar communicaziun
Sco ch'il nov secretari scriva, vesa el la Lia Rumantscha sco center da cumpetenza che pussibilitescha e promova il svilup da la Rumantschia. Sco secretari general veglia el intensivar la communicaziun interna ed externa.
La funcziun sco secretari general da la Lia Rumantscha ma permetta dad esser pli datiers da mias ragischs e da tgirar e sviluppar noss stgazi cultural – il rumantsch.
Solinger cumenza sia lavur il 1. d'avust, sco dapi il december resta Andreas Gabriel vinavant ad interim il secretariat general.
Successur da Diego Deplazes
Solinger succeda a Diego Deplazes che aveva annunzià l'october da l'onn passà ch'el sa retira da ses post suenter var dus onns. Deplazes è dapi l'avrigl da quest onn il manader da fatschenta da la Crusch Cotschna Svizra dal chantun Grischun. Suenter la demissiun da Deplazes aveva la suprastanza installà ina gruppa da lavur per elavurar il profil e tschertgar in successur u ina successura.
In vallader al timun
Solinger vegn ad esser il 12avel secretari general da la Lia Rumantscha. Tradiziunalmain vegn il secretari general plitost da la Surselva entant ch'il presidi è en mauns ladins. Cun Solinger da Scuol vegn ussa per l'emprima giada dapi ils onns 50 il secretari da l'Engiadina. La regiun rumantscha la pli gronda n'è cun quai represchentada ni en il presidi ni en il secretariat general.
