L'emprim project prevesa d'introducir in sistem da segirezza che duai gidar ad impedir grevs acts da violenza intenziunads. Quest instrument duai enconuscher signals tipics per in'escalaziun ed avertir la Polizia chantunala per ch'ella po identifitgar a temp persunas ch'èn prontas d'utilisar violenza. Ultra da quai duai la Polizia chantunala era pudair pronunziar scumonds d'areal, d'avischinaziun e da contact cunter persunas che pudessan periclitar insatgi.
Barat da datas duai vegnir pli simpel
Ina segunda revisiun parziala duai facilitar il barat d'infurmaziuns da polizia sin nivel naziunal. La finamira è da colliar bancas da datas chantunalas da polizia, uschia che las infurmaziuns polizialas pon vegnir consultadas directamain. En pli èn en elavuraziun sistems che duain pussibilitar l'administraziun e l'analisa da las datas sin plaun interchantunal.
Per ch'il chantun Grischun possia profitar da quels instruments ston las basas giuridicas necessarias vegnir adattadas, sin stgalim da la lescha. La consultaziun da las midadas vi da la lescha da Polizia chantunala cuzza fin la fin d'avust.
Or da l'archiv:
La lavur da la polizia
