Gronds hotels a Vulpera han gì onns da grond success cun il tema aua minerala. Giasts vegnivan bel ed aposta en l'Engiadina per far curas da sanadad cun baiver las differentas auas mineralas che sburflan enturn la vischnanca da Scuol. Durant ils onns 80 han però auters temas dominà il turissem. Il tema aua minerala n’era betg pli in tema central. Oravant tut la medischina innovativa ha stgatschà l’aua minerala.
Turissem vul dar nova vita al tema aua minerala
Il turissem prevesa però da reactivar pli fitg il tema en l'avegnir. Cun in'app veglian ins raquintar da l’istorgia dals hotels a Vulpera en connex cun l’aua minerala. Ina sommeliera d’aua duai preschentar ils gusts e las qualitads da las auas mineralas che sburflan permanentamain or da las muntognas. Ultra da quai duain funtaunas sco er lieus istorics vegnir reactivads.
Radund 25 funtaunas datti enturn Scuol. Scuol ha, quai che reguarda il tema aua minerala, ina posiziun unica. Da quella posiziun veglian ins puspè profitar pli fitg. Cun ils partenaris, sco il Bogn Engiadina u il Center da sanadad Engiadina Bassa, prevesian ins perquai da realisar purschidas e projects attractivs per laschar reviver il tema «aua minerala».
Or da l'archiv:
