L’emprima naiv da la stagiun fin giu en la Bassa ha chaschunà in caos da traffic en pliras parts da la Svizra. En il Grischun haja dà radund 10 accidents da traffic pervi d'in equipament betg adattà – vul dir: tals ch'eran sin via cun pneus da stad. Cunzunt en il nord dal tunnel dal San Bernardino e tranter Tumein e Glion han quels accidents chaschunà impediments da traffic. Quai scriva la Polizia chantunala. En il chantun Turitg ha la polizia dumbrà radund 150 accidents da traffic. Er en ils chantuns Berna e Son Gagl hai dà blers accidents. En las citads da Basilea, Berna e Turitg è il traffic public per part stà interrut cumplettamain. Pass per pass vegnia il manaschi reprendì. Er sin la rait da la SBB datti retards e trens che crodan or.
En il Grischun annunzia ni la polizia ni la Viafier retica disturbis pli gronds per il mument.
Dentant:
- Il Pass dal Flüela è serrà per motivs da segirezza.
- Il Pass dal Spleia è serrà per il rest da l'enviern.
- cuvertas cun naiv èn las vias sisum la Surselva, en l'Engiadina sco er en il Partenz, direcziun Arosa e direcziun Lai, Casti e Bravuogn.
Privel da lavinas considerabel per parts dal Grischun
L'institut da naiv e lavinas a Tavau annunzia per la vart nord dal Rain Anteriur ed il Signuradi in privel da lavinas considerabel, stgalim 3. Per il rest dal chantun vala in privel da lavinas moderà, stgalim 2.
Tipps per il viadi cun l'auto tras la naiv
Las cuntradas èn alvas e las vias per part glischas. Per evitar da ruschnar senza vulair datti qua intgins tipps:
- Avair montà pneus d'enviern e nua cusseglià u perfin obligatoric da montar chadainas (excepziun 4x4).
- Deliberar l'auto da naiv e glatsch.
- Ir uschè svelt sco ch'igl è adattà a las cundiziuns.
- Betg dar memia bler gas u franar memia svelt.
- Sche las rodas tiran tras il meglier dar pli pauc gas.
- Betg ir en vials dad auters autos – quellas èn savens glischas.
