La Ems Chemie ha fatg l’onn passà damain svieuta, ma dapli gudogn: La svieuta saja sa reducida per passa 5,4% sin bunamain 2,1 milliardas francs, cumpareglià cun l’onn avant. Sut il stritg resultia in gudogn da 466 milliuns francs, in plus dad 1,1%.
Il cussegl d’administraziun propona d’augmentar la dividenda sin 17 francs e 25 raps per aczia. L'onn passà eran quai anc 16 francs per aczia.
Malsegirezzas tar consuments
Ils conflicts actuals chaschunian malsegirezza tar ils consuments e tar las interpresas. Quai ha communitgà il concern. En quest connex numna la Ems era il president dals Stadis Unids Donald Trump. Sia politica d'economia ch'el ha annunzià, saja grev da giuditgar ed haja in «effect destabilisond» – quai surtut sin las chadainas da furniziun globalas. Ultra da quai saja la Germania, il pajais europeic d'industria il pli impurtant, en ina recessiun. Entant sa stabiliseschia il martgà d'immobiglias chinais e las interpresas e consuments survegnian puspè fidanza.
Plinavant saja il martgà d’autos global en transfurmaziun. En il martgà d'autos chinais il pli grond dal mund gudognan ils producents locals sin donn e cust da l'exteriur. En l'Europa ha il martgà d'autos electrics registrà il 2024 ina diminuziun cumpareglià cun l'onn avant. Tant ils Stadis Unids sco er l'UE avevan mess il 2024 dazis da chasti cunter imports d'autos chinais. Entras la situaziun geopolitica instabila saja il franc svizzer daventà pli ferm. Quai ch'haja gì in effect sin la svieuta en francs svizzers.
Ems na vegnia betg ad esser pertutgada da dazis da multa
La Ems haja dentant prendì mesiras. Ella haja restructurà las rutas da furniziun, uschia ch'ella na vegnia betg ad esser pertutgada da quests dazis da multa. Plinavant vegnia il concern a sa concentrar pli fitg sin innovaziuns. Il 2023 aveva la Ems cumenzà a bajegiar ora en tut las regiuns, Asia, America ed Europa - fin la fin dal 2025 quint'ins cun in augment da persunal da 75%. Fin uss hajan questas investiziuns rendì, scriva l'interpresa.
Prognosa per il 2025
Per l'onn 2025 spetga la EMS puspè ina svieuta netta pli bassa pervia da l'inflaziun da l'onn precedent ed in resultat da gestiun (EBIT) levamain sur l'onn precedent.
