L'Ems Chemie ha fatg l’onn passà damain svieuta e gudogn ch’il 2022. La svieuta saja sa reducida per passa 10% sin bunamain 2,2 milliardas francs. Il gudogn saja sa reducì per bunamain 14% sin 461 milliuns francs. Quai ha communitgà il concern.
La conjunctura n'era betg buna. E quella en cumbinaziun cun il ferm franc svizzer n'avain betg pudì cumpensar cun l’innovaziun – nua che nus avain dà gas.
D’attribuir saja quest resultat tranter auter al ferm franc svizzer ed a l’ambient dal martgà global che saja vegnì mender. L'inflaziun haja era attribuì ad in onn difficil. Uschia n'hajan era bleras firmas betg pli emplenì si lur magazin.
Il cussegl d’administraziun propona a la radunanza generala da pajar ina dividenda da 16 francs per aczia. L’onn avant eran quai anc 20 francs. Per l'onn current quinta l'Ems Chemie cun ina svieuta en il rom da l'onn passà.
Per il concern da chemia han lavurà il 2023 2'736 persunas, quai èn 43 persunas dapli ch'anc il 2022.
Dapli persunal malgrà onn difficil
Dal 2021 aveva la Ems preschentà in pachet d'investiziuns da 300 milliuns francs al lieu da producziun Domat. Quellas investiziuns cuntinueschan era en il 2024. Tiers vegn ch'ins vul bajegiar ora il persunal en la partiziun da svilup. La Ems vul crescher pli svelt e manar las innovaziuns pli svelt sin il martgà. Malgrà conjunctura nauscha vul'ins uschia crescher sur il martgà, accentuescha Magdalena Martullo.
Prognosa 2024
La scheffa da la Ems prognostitgescha che la conjunctura na vegn betg ad esser meglra en il 2024 «i vegn a sa sfradentar plitost anc pli fitg sin l'entir mund», di Magdalena Martullo. La Ems vul però vinavant dar gas sin il martgà e vul uschia cumpensar quai per ina part. Il concern spetga in meglier onn.
Per quest’onn spetgain che la svieuta saja circa sin l'onn precedent ed il resultat levamain sur quel da l'onn precedent.
