La blera glieud pensa che la pestga cumenza l'emprim da matg. A la riva dal Rain sco era en in pèr lajets pon ins dentant gia cumenzar cun il pestgar a partir da l'emprim da favrer. Perquai èn ils pestgaders e pestgadras gia dapi in mais vi da sa perparar: s'infurmar nua ch'ils megliers lieus èn, tge estgas ch'èn adattadas per carmalar ils peschs e natiralmain èsi d'organisar la patenta.
Tips or da la butia da pestga Falk
Tips per la pestga d'enviern survegnan ins tranter auter er en butias da pestga, sco per exempel en la butia Falk a Cuira. Per il possesur da la butia Rolf Galliard datti in pèr puncts ch'ins ha da resgurdar durant la pestga dal favrer. Per avair success saja impurtant da savair ch'ils peschs n'èn anc betg fitg activs. Perquai èsi da pestgar en las zonas nua ch'ils peschs sa chattan actualmain. Là hajan ins da bittar il verm direct davant la bucca dal pesch, cun quai ch'els n'èn actualmain betg anc grond a chatscha.
Jau cussegl dad ir al flum a pestgar.
Al flum chattian ins tenor Galliard il mument bels e gronds peschs. Ins possia er ir pestgar en in lai, dentant saja il mument pli interessant da pestgar en il flum.
Pestgar il favrer saja «magic»
Era sch'igl è il favrer pli difficil da pestgar che la stad, rendia quai tuttina, manegia Rolf Galliard, il mainafatschenta da la butia da pestga Falk a Cuira.
L'emprima bittada cun la pertga l'emprim da favrer è magic.
Enfin ussa èn vegnidas retratgas var 400 patentas per la stagiun da pestga. Sche tut quels pestgaders e las pestgadras cun patenta cumenzan gia il favrer a pestgar u pir pli tard, na possian ins betg dir.