RTR: Giais Vus oz cun in auter sentiment tras l’Engiadina?
Frank Stüssi: Nus avain ina giada ponderà sche nus duain participar al Maraton da skis engiadinais sco la cumissiun da concurrenza (Weko). Nus avain lura decidì da betg far quai.
Sche jau u insatgi da mes collavuraturs e da mias collavuraturas essan en gir tras il bel chantun Grischun u l’Engiadina tramettain nus magari era ina u l’autra fotografia sche nus passain tavlas cun si ils nums da las interpresas da fabrica. I n’è quasi betg pussibel per nus dad ir tras l’Engiadina senza ch'il cas vegn endament.
Tge munta il cas dal cartel per Vus persunalmain?
Jau sun collià cun il Grischun dapli l’uffanza. Il cartel m’ha prendì in zic da la bellezza dal chantun cun quai ch’ins sa uss ch'i dat davos tut questa idilla, la glieud grondiusa e la cuntrada fantastica era questa vart cun il deport illegal. E quai prenda in zic la bellezza.
Co è il temp da retschertga en il cas da cartel da fabrica dal Grischun stà per Vus?
Nus essan in bun team. Avain blera glieud motivada che lavura fitg conscient e metta gronda paisa sin la qualitad. E jau crai che nus essan propi ids enturn professiunalmain cun il cas. Ma igl è cler ch'in cas sco quest na lascha betg fraid ins. Pia sch’ins vesa che bleras interpresas fan chaussas che n'en betg lubidas, sch’ins vesa era qua in u l’auter represchentant dal maun public ch'ha probablamain vis tge che capita, lura dat quai da ponderar.
Tge è il mument ch'è restà il pli fitg durant l’inquisiziun?
Quai è sta il mument che nus avain communitgà il cas Engiadina 1. Quest mument è crudà ensemen cun las elecziuns da la regenza ed era cun ils rapports dal magazin «Republik». Era RTR ha rapportà là durant emnas intensivamain da quest cas. Quai è stà fitg impressiunant tge che quai ha chaschunà. Era da vesair ch'igl ha lura dà anc ina cumissiun parlamentara d'inquisiziun (PUK) è sta impressiunant. E betg d'emblidar ils inscunters cun represchentantas e represchentants da las vischnancas ed ils inscunters cun la regenza. Tge ch'il cas Engiadina 1 ha effectuà è propi stà impressiunant dentant era pretensius.
Danunder prendis Vus la motivaziun da retschertgar tals cas?
Jau hai adina tschertgà sapientivamain ina plazza nua ch’jau poss meglierar l’economia publica. Tar la Weko è quai la finamira. Ins vul organisar ils martgads uschia ch'i funcziunan uschè bain sco pussibel senza cumportament illegal. Per mai e per mes collavuraturs e mias collavuraturas è quai nossa DNA: Nus vulain concurrenza en l’economia dentant senza cumportaments nunlubids.
Vegnis Vus savens mess sut squitsch dad interpresas u persunas encunter las qualas i dat investigaziuns?
Nus avain vis a l’entschatta dals onns 2000 ch’il problem da submissiun è fitg grond en Svizra ed avain lura decis da metter là in accent. La strategia pon ins atgnamain parter en trais puncts. Per l’ina avain nus decidì da sensibilisar per avair in effect preventiv. En segunda lingia avain nus sviluppà in tool d'analisa e vitiers vegn sco terz punct da scuvrir activamain talas cunvegnas da pretschs. Nus faschain nossa lavur tenor meglier savair e pudair e cun gronda motivaziun. Noss focus n’è uschia betg sin las smanatschas. Quellas èn davostiers.
Dovra quai blera pazienza?
I dovra in lung flad. I n’è betg uschia ch’ins po dir suenter dus dis: «so, ed uss il proxim cas». Per exempel cumenzain en quest cas cun ina perquisiziun da chasa ed ins è lura set onns pli tard a l’arrivada. Igl è plitost in ultramaraton dubel. E quai dovra in fitg lung flad, i dovra perseveranza ed i dovra pazienza e motivaziun.
Or da l'archiv