Cumenzà ha tut l'onn 2012. La cumissiun da concurrenza Weko ha survegnì infurmaziuns ch'i pudess dar cunvegnas da pretschs en l’Engiadina. Ina giada che l'inquisiziun ha cumenzà han ins constatà ch'il cas è bler pli grond che pensà. Uschia èn las inquisiziuns sa schlargiadas 'onn 2015. La cumissiun da concurrenza era sezza surpraisa da la dimensiun, declera il vicedirectur e manader da la secziun da construcziun da la Weko Frank Stüssi envers RTR. Bundant sis onns suenter ch’il cartel è vegnì scuvert èn anc averts davant il Tribunal administrativ federal trais recurs. Singuls cas han las interpresas pertutgadas tratg enavant fin tar il Tribunal federal.
Che nus avain survegnì raschun dal tribunal en il principi ch'igl ha dà cunvegnas da pretschs è per nus in mussament impurtant che nus avain fatg endretg nossa lavur.
Per las inquisiziuns ha la Weko resguardà ils onns 2004 enfin 2012. Ed ins ha pudì mussar si cunvegnas da pretschs en 1'150 cas. Frank Stüssi di ch'ins stoppia partir dal fatg ch'i ha era dà ils onns precedents cunvegnas da pretschs. Ins n’haja mai pudì sclerir tut ils cas da cunvegnas da submissiun ch'igl ha dà.
Nus na faschain las inquisiziuns betg per chastiar, mabain per scuvrir cunvegnas da pretschs.
Il cas en il Grischun haja uschia era gì in effect preventiv. La grondezza dal cas ha gì effect cun trair l’attenziun mediala. Quai haja procurà che tut quels che savevan da quai na pudevan betg pli guardar davent.
Dasper la dimensiun dal cas fa surstar co che las interpresas han agì senza avair scrupels.
Laud per il chantun Grischun
Il chantun Grischun haja agì fitg bain suenter che las cunvegnas da pretschs èn vegnidas scuvertas, manegia il vicedirectur da la Weko Frank Stüssi. Il chantun haja sensibilisà il persunal sco era las vischnancas, e fatg cler che cunvegnas n’èn betg acceptadas.
Il cas en il Grischun ha era sensibilisà sur ils cunfins chantunals ora.
L'effort dal chantun stima Frank Stüssi. Ed era la populaziun è vegnida sensibilisada tras ils rapports da medias. Cunvegnas da pretschs fan numnadamain ir ad aut ils pretschs, e quai per fin al dubel. Studis mussan ch'ils pretschs s’augmentan tranter 25 e 45%.
Inquisiziuns en la Mesolcina
Dentant era sch'i ha dà ina sensibilisaziun, è la Weko actualmain vi d'intercurir in ulteriur cas da probablas cunvegnas da pretschs en il Grischun – en la Mesolcina. Indizis mussan che las cunvegnas en la vallada dal sid hajan gì lieu suenter ch'il cartel d’Engiadina è vegnì a la glisch, e suenter ch'il chantun ha sensibilisà.
Cura che nus avain gì indizis a las cunvegnas da pretschs actualas en la Mesolcina ma sun jau dumandà, sche quellas interpresas èn fitg tuppas ubain fitg scortas. Ma i era cleramain schoccant.
La Weko ha cumenzà las inquisiziuns da l'onn 2020 e schlargià quellas dal 2021. Cura che las inquisiziuns èn terminadas na san ins anc betg dir.