Il campus da l'Institut autalpin a Ftan ha in nov manader. Num ha el Jared Nolan. Quai scriva l'institut en ina communicaziun. La decisiun saja crudada suenter ina tschertga fundada internaziunala ed in'evaluaziun vasta da differents candidats autqualifitgads, uschia l'institut plinavant. Chattà il nov manader ha l'Institut autalpin Ftan alura era en l'exteriur.
Candidat cun experientscha internaziunala
Jared Nolan viva actualmain a Dubai. Tenor la communicaziun è el in mainascola cun experientschas vastas en il sectur da furmaziun. Tranter auter è el stà mainascola en la Gronda Britannia, la China ed ils Emirats Arabs Unids. Sias fermezzas sajan da sviluppar e realisar strategias operativas e pedagogicas ch'hajan sco finamira da promover il potenzial da persunas giuvnas. Nolan saja persvas che persunas giuvnas sviluppeschian lur potenzial sch'ellas vesian lur schanza en la vita.
L'Institut autalpin Ftan porscha in conturn unic en il qual scolaras e scolars pon crescher persunalmain, perscrutar ed interagir a moda sociala en il team.
La lavur da polizist sco basa
Avant d'avair lavurà en il sectur da la furmaziun era Jared Nolan durant 12 onns polizist. En questa lavur haja el fatg experientschas custaivlas en il sectur da la criminalitad e da la protecziun d'uffants. Questas experientschas haja Nolan nizzegià pli tard per far il pass en direcziun da scolas. Sco proxim pia sco manader dal campus da l'Institut autalpin a Ftan.
Per il rest da l'onn da scola 2023/2024 saja vinavant Caroline Taylor responsabla per la lavur sco manadra dal campus. Ella vegnia entant a collavurar stretgamain cun il nov manader elegì per pudair garantir ina surdada speditiva e senza incaps.
