L'iniziativa «Finì cun il paracrudada dad aur per commembras e commembers da la regenza» è reussida cun passa 4'300 vuschs valaivlas – necessarias eran minimum 3'000. Quai ha la Chanzlia chantunala communitgà. Anc n’èsi betg cler, cura ch’il suveran grischun po decider en chaussa.
L’iniziativa da la PPS pretenda che cusseglieras e cussegliers guvernativs che sortan da la regenza na duain betg pli survegnir ina renta per vita duranta. Ozendi enconuschan dasper il Grischun be pli ils chantuns Vad e Berna questa pratica en Svizra.
Ina renta sur 100'000 francs l'onn na saja tenor la PPS betg necessari per cusseglieras e cussegliers guvernativs anteriurs. Quellas persunas hajan bleras cumpetenzas ed èn persunas enconuschentas, uschia ch'ellas chattan svelt puspè ina lavur pajada. Plinavant na saja betg necessari da pajar anc dapli raps, sper la cassa da pensiun ed ils daners da l'AVS.
En il parlament chantunal ha la proposta da la PPS gì in grev stan. Perquai porta la partida uss lur finamira avant il pievel. Il cusseglier naziunal da la PPS, Roman Hug, è persvas da chattar là avunda sustegn.
Il sistem da rentas per la regenza è vegnida introducida ils onns 40 e 50. Da quel temp n'hai anc betg dà ina segunda pitga per persunas en la regenza. Quai s'haja fin uss dentant midà. Be ils chantuns Grischun, Vad e Berna enconuschan anc la pratica.