Gia la fin da l'onn 2023 èsi stà cler: Chatschaduras e chatschadurs duain gidar a regular il luf. Fissi ì tenor plan, fissan els gia vegnì il december passà en acziun. Pervi d'in recurs è questa premiera però sa stuschada sin la chatscha auta dal 2024. Las emnas avant chatscha è l'Uffizi da chatscha e pestga perquai stà sin turnea tras il Grischun cun la finamira da scolar ed infurmar chatschaduras e chatschadurs ch'han gì interess da sa participar vi da la regulaziun. Pertge gidar a regular il luf dastga be tgi ch'ha visità ina da las sairas d'infurmaziun. L'interess a las sairas d'infurmaziun è mintgamai stà grond.
Paucas emnas avant che la chatscha auta cumenza n'eri anc betg cler sche e tge lufs che dastgan vegnir regulads. I valia però la paina da sa preparar a temp per il cas ch'i vegn serius, uschia Arno Puorger.
Per chatschaduras e chatschadurs che van normalmain en il guaud per sajettar tschiervs, chavriels u chamutschs èsi stà ina situaziun speziala dad era prender en mira il luf, sco plirs chatschaders ch'han visità ina da las sairas d'infurmaziun han ditg envers RTR.
La damaun u la saira – durant il meglier temp da chatscha – na sajettass jau mai in luf. Pertge lura vi jau sajettar ina chaura u in chavriel.
Jau sun led sch'jau pos sajettar sco usità la selvaschina. E sch'jau pos regular il luf entras in schabetg casual, lura pos jau far quai.
Nus chatschaders avain er in'obligaziun da betg be ir a chatscha per noss diever. Jau sun led, cuntent e losch che l'uffizi da chatscha ha prendì questas mesiras.
Paucs dis avant che la chatscha auta cumenza è il Grischun en fevra da chatscha. La patenta è cumprada, il satgados pachetà e la buis quasi chargiada. Però il tun da partenza da la Confederaziun manca anc. L'Uffizi federal d'ambient n'ha enfin la fin avust anc betg tramess las lubientschas. Da quel temp ha la cussegliera guvernativa responsabla Carmelia Maissen chattà clers pleds per l'agir da l'uffizi federal.
Jau sun fitg trumpada da l'agir dal BAFU. Tenor mes avis n'è quai betg acceptabel. Il termin dal 1. da settember è gia enconuschent ditg. Jau hai spetgà che las lubientschas èn sin maisa.
La chatscha grischuna cumenza, ma il chantun n'ha anc betg las lubientschas da sajettar lufs, nundir da dar vinavant la balla a chatschaduras e chatschadurs. Igl è lura però i svelt. A partir dals 4 da settember han chatschaduras e chatschadurs pudì sustegnair da sajettar lufs dal triep dal Vorab. Tec a tec èn ulteriuras lubientschas da l'Uffizi federal d'ambient arrivadas uschia che chatschaduras e chatschadurs èn vegnidas en acziun per sa gidar a regular entirs trieps respectivamain lufs singuls. Lufs giuvens ha be la guardiaselvaschina dastgà sajettar. Tut en tut era la finamira da sajettar 60 lufs.
Durant la chatscha auta èn la finala 16 lufs vegnids sajettads – era cun l'agid da chatschaduras e chatschadurs.
Ils chatschaders han pudì sajettar dus lufs ed uschia pudì sustegnair nus. Nus essan fitg cuntents.
Enfin la fin schaner ha l'Uffizi da chatscha e pestga anc temp da regular ils lufs. Durant la chatscha speziala era cun agid da chatschaduras e chatschadurs. Lezza bilantscha n'è però anc betg sin maisa.
