En il Grischun cumenza la stagiun da construcziun. Sin ils 1'360 kilometers da las vias chantunalas vegni quest onn a dar 157 plazzals planisads, sco l'Uffizi da construcziun bassa communitgescha. 78 da quels pertutgan las vias principalas e 79 las vias lateralas. Auter che l'onn passà vegnia quest onn endrizzà damain amplas da traffic. Quai era per pudair optimar il traffic.
Nua ch’igl è pussibel empruvain nus d’installar provisorics da vias per uschia evitar las amplas da traffic.
Quest onn vegnia tranter auter construì sin la via d'Engiadina a Zuoz ina rundella. A La Punt vegn cumenzà il settember cun il sviament. Sisum la Surselva vegn la via dal Lucmagn schlargiada.
Era plirs projects pli gronds vegnan terminads quest onn. Per exempel la punt Spuondas tranter ils lais da San Murezzan e da Silvaplauna sco era la via tranter Cuira e Malix.
Ils detagls en survista
Agid per betg spetgar memia ditg davant amplas da traffic
Amplas da traffic mobilas duajan reglar il traffic tras plazzals a moda segira ed effizienta. Sco l'uffizi scriva, na funcziuneschia quai dentant betg adina. Blers automobilists ed automobilistas n'enconuschian betg bain avunda la funcziun da quellas amplas. Per meglierar la situaziun testescha l'uffizi da construcziun bassa quest onn strivlas da fermar davant las amplas. Quellas mussan als automobilists nua sa fermar per che las amplas funcziuneschan correct.
Il pli impurtant è che l’emprim auto ha la dretga distanza tar l’ampla. Uschia che lezza registrescha il signal correctamain.
Las amplas da traffic davant plazzals èn equipadas cun sensurs. Quels registreschan sch'in vehichel ferma davant l'ampla. Sch'ina automobilista ferma dentant memia lunsch davent na registrescha il sensur betg quai ed uschia na dat l'ampla betg liber la via.
Las strivlas oranschas duajan mussar nua che manischunzs duajan fermar per ch'il sensur registreschia els e mida uschia spert da cotschen sin oransch sbrinzlond.
Or da l'archiv: