La regenza grischuna ha preschentà il mardi intgins da ses puncts centrals or dal program per il 2024. Las total 88 finamiras tractan dumondas da las scolas autas, dal traffic public sco era dal sectur social e da la sanadad.
Ina da questas finamiras è la realisaziun da l ’emprima etappa da l’iniziativa da tgira . Quella iniziativa ha il suveran svizzer approvà il november 2021. Per realisar ella mettan la Confederaziun ed ils chantuns era la paisa sin la scolaziun – per uschia meglierar la situaziun da persunal en quest sectur.
La tgira d'uffants cumplementara
Dapli daners datti a partir dal 1. d’avust per tut las spiertas da la tgira d’uffants cumplementara a la famiglia. Las tariffas n’èn lura betg pli liadas vi da las entradas da las famiglias. L’informatica per realisar la revisiun da la lescha revedida ha dentant retard. Sco gia enconuschent vegn quella pir il 2025 en funcziun.
Auter temas da coc da la regenza grischuna quest onn èn – da restar activ areguard il svilup da la gulivaziun da finanzas sin il livel naziunal, da cuntinuar cun la digitalisaziun da l’administraziun chantunala, da cuntinuar cun il program da vias e cun l’augment dal traffic public.
