Il pe da taglia chantunal vegn sbassà per 5% sin 95%. Quai ha il Cussegl Grond decis en il rom da la debatta da preventiv. El suonda uschia la proposta da la regenza grischuna, quai cun 66 vuschs. Fin ch’igl è stà uschè lunsch hai dà discussiuns animadas. La dumonda centrala è stada: Per quant vulan ins insumma sbassar la taglia? Deputadas e deputads han discussiunà da moda animada e dà in a l'auter en las costas.
En tut hai dà betg main che 26 votums en chaussa. Quai da la dretg fin tar la sanestra. La debatta davart sbassar il pe da taglia chantunal ha, tut en tut, cuzzà radund 2 uras e 30 minutas.
5%, 7% u 10%?
Sper la proposta da la regenza da sbassar per 5% avessan ils liberaldemocrats e la Partida populara gugent reducì il pe da taglia per 10%, ils Verd-liberals per 7%. La finala ha la proposta dal minister da finanzas Martin Bühler cuntanschì ina maioritad uschia che pajataglias en Grischun pon sa legrar d'in sbassament dal pe da taglia chantunal da 100% sin 95%.
Il resultat da la votaziun en detagl
- 66 vuschs per proposta da la regenza grischuna (-5%)
- 42 vuschs per la proposta da la PLD (-10%)
- 5 vuschs per la proposta dals Verd-liberals (-7%)
A partir da l’onn 2025 importia la reducziun fiscala uschia annualmain radund 32 milliuns francs. Quai tenor calculaziuns dal chantun.
Il segund pass saja planisà cun ina revisiun da la Lescha da taglia per il chantun Grischun l'onn 2025. La libertad d'agir finanziala duai uschia vegnir tratga a niz cumplainamain, declera la regenza vinavant. Las perditas da taglia dal chantun duain vegnir finanziadas tras futurs deficits dal quint da l'agen chapital a libra disposiziun.
Budget 2024 approvà
Per l'onn 2024 budgetescha la regenza grischuna in deficit da 49,6 milliuns francs. Malgrà che numerus pajaments da la Banca naziunala svizra e da la Confederaziun vegnan a mancar, saja il preventiv 2024 anc equilibrà. Quest budget per l'onn proxim è vegnì approvà dal Cussegl grond.
Il chantun vegn ad investir dapli il proxim onn. Las expensas d'investiziun planisadas per il 2024 importan 482,6 milliuns francs, l'onn 2023 eran quai 451,2 milliuns francs. Projects da la construcziun auta ch'èn cuntegnids en il preventiv 2024 èn per exempel la renovaziun dal center da dietas al Plantahof, la construcziun da la nova halla da controlla da l'Uffizi per il traffic sin via a Roveredo, la renovaziun e l'engrondiment da l'edifizi chantunal sco er la construcziun dal nov center da scola auta spezialisada a Cuira.
