Suenter ch’il process ha cumenzà cun intginas formalitads ed infurmaziuns davart l’andament dal process ha la dretgira decis, che tut las persunas duessan dastgar restar anonimas. Sin quai è lura l’emprima perditga vegnida interrogada, ina collavuratura da la dretgira. Il derschader inculpà era il schef da questa dunna. Ella ha pia lavurà ensemen cun l'anteriur derschader e la praticanta. L'interrogaziun è ida fitg en ils detagls – tranter auter èsi ì per la tschaina da Nadal planisada da la dretgira durant quest temp. Tut en tut è vegnì ora che la perditga haja mai udì u vis insatge d'ina relaziun sexuala tranter il derschader e la practicanta. Suenter l'interrogaziun ha il public stuì bandunar la sala – ed er l’inculpà ha stuì ir ora.
Ils derschaders sisum, praticantas e praticants giusut
Sin quai è l'anteriura praticanta e presumabla unfrenda vegnida interrogada. L’emprima dumonda che la derschadra ha fatg: Co vai cun Vus? Respundì ha ella ch'ella saja fitg stressada e fitg sut squitsch. Silsuenter èsi ì per sia sanadad psichica – i na giaja betg bain, ella saja en terapia dapi lura ed era adina puspè scritta malsauna. Silsuenter hai dà dumondas davart il praticum tar la dretgira che haja l'entschatta plaschì fitg bain. Lura hajan las mulestas cumenzà via chat, ed ella haja l'entschatta anc pensà che quai saja manegià legher. I saja dentant spert vegnì malempernaivel per ella.
L'anteriura praticanta declera lura ch'ella haja betg pli pudì durmir. Ella haja sin quai mussà ils chats a ses paternari sco er a ses geniturs. Tuts eran d’accord che quai na saja betg professiunal davart dal derschader. Tuttina haja ella mess en dumonda sasezza, sch'ella fetschia uss ord ina mustga in elefant. La ierarchia saja stada fitg clera tar la dretgira – ils derschaders sisum, praticantas e praticants giusut. Perquai haja ella er gì grond respect da l’inculpà. Sin dumonda ha la dunna lura stuì descriver fitg en detagl la violaziun che saja capitada ils 13 da december 2021. Silsuenter ha ella stuì respunder bleras ulteriuras dumondas da detagl puncto l'agen cumportament ed er il cumportament dal derschader. Per l'inculpà vala la presumziun d'innocenza.
Dumondas e repostas en connex cun il cas
La FMR ha mess ensemen las dumondas principalas che sa laschan respunder gia avant il process.
Nua ha lieu il process? L’interess medial è grond. Var ventg schurnalistas e schurnalists da l’entira Svizra rapportan dal process. La Dretgira regiunala Plessur n’ha betg stanzas che fissan grondas avunda. Perquai ha ella spustà il process en ina stanza dal bajetg dal Cussegl grond a Cuira.
Quant ditg dura la procedura? La dretgira ha reservà dus dis. La gievgia vai per las cumprovas. L’inculpà vegn interrogà. Era l’unfrenda sto respunder dumondas. Forsa dattan era perditgas pled e fatg. Il venderdi suondan ils pledoyers da l’advocata da l’inculpà e da la procuratura publica. La dretgira dat enconuschent la sentenzia pir intgins dis suenter il process.
Tgi è l’inculpà? Las medias che rapportan dal cas, han stuì s’obligar da betg numnar il num da l’inculpà – sco tar autras proceduras giudizialas era. Durant il malfatg è il derschader stà en uffizi tar la Dretgira administrativa dal Grischun. El è sa retratg suenter che la chaussa è vegnida a la glisch. I vala per el la presumziun d’innocenza.
Tgi è l’unfrenda? I sa tracta dad ina giuvna giurista che ha fatg in praticum en la Dretgira administrativa per suenter pudair absolver l’examen d’advocata.
Tge è la renfatscha? Ils 13 da december 2021 haja il derschader violà la praticanta, che aveva da lez temp 24 onns. Quai saja capità en la dretgira administrativa en il biro dal derschader. Da bell’entschatta haja la praticanta fatg cler ch’ella na veglia nagin contact sexual – tant cun dir sco era cun stuschar davent l’inculpà. Entras sia forza e dominanza corporala haja il derschader sfurzà ella ad acts sexuals. Uschia resumescha la Dretgira regiunala Plessur la renfatscha da la procura publica en la prevista sin il process. L’inculpà refusa las renfatschas. El conceda bain ch’i haja dà in contact sexual, ma omadus sajan stads perina.
Violaziun u nizzegià dependenza? Empè d’ina violaziun – «eventualiter» sco ils giurists din – vegn en dumonda era in auter delict penal, numnadamain il nizzegiar ina situaziun da dependenza e sfurzar uschia ina persuna a sex. L’unfrenda haja temì che l’inculpà – cun sia posiziun e ses contacts tar politichers, autoritads ed advocats – pudess prender influenza sin sia carriera professiunala ed impedir quella, stat scrit en la prevista sin il process. En pli haja il derschader gia avant la violaziun mulestà pliras giadas la praticanta, tant en chats sco era corporalmain.
Pertge è l’ami da l’unfrenda era pertutgà? L’ami da l’unfrenda vegn era menziunà sco donnegià. Il settember 2023 hajan l’ami e la praticanta survegnì brevs anonimas da l’anteriur derschader. Lez haja smanatschà ch’i saja instradà ch’els dus na passian betg l’examen d’advocats dal Grischun.
È il process public? Gea. Mintga process penal è public danor process cunter giuvenils. Damai che gia las medias occupeschan var ventg sezs, hai be anc plaz per circa in tozzel aspectaturs u aspectaturas.
Co vegn l’unfrenda protegida durant il process? In process po retraumatisar ina unfrenda d’in delict sexual. Perquai prenda la dretgira pliras mesiras. Per l’ina vegn evità che l’inculpà e l’unfrenda s’inscuntrian durant il process. L’unfrenda po tadlar las tractativas, per exempel l’interrogaziun da l’inculpà, en ina stanza vischina. Il public sto plinavant bandunar la stanza, cura che l’unfrenda raquinta a la dretgira sia vista, tge ch’è capità.
Tge chasti pretenda la procura publica? Gliez n’è anc betg cler. Era l’act d’accusaziun, nua che la procura publica descriva en detagl ils delicts, n’è anc betg publitgà. Las medias survegnan invista pir ina mes’ura avant ch’il process cumenza. Il chasti che la procura publica pretenda, sto para esser pli bass che tschintg onns praschun. Pertge? Per fitg auts chastis dovri in gremi da tschintg derschaders. Per quest process èsi prevedì be in gremi da trais derschaders.
Tgi ha da truar? La derschadra Bettina Flütsch maina il process. La giurista ha studegià a Lucerna e tutga da preschent tar las trais derschadras extraordinarias che gidan a sminuir las pendenzas a la Dretgira Plessur. Ils derschaders assessurs èn Paul Schwendener – el è gia pensiunà e posseda ina furmaziun giuridica – e Hermi Saluz che n’è betg giurist.
Tgi defenda l’inculpà? Tanja Knodel è sia defensura. Areguard la revisiun dal dretg penal sexual chattan ins differentas intervistas cun l’advocata. Ella è mintgamai sa fatga ferma per «na è na» tar il delict da violaziun. Lezza varianta è en vigur dapi in onn.
Tgi è la procuratura publica e pertge vegn ella crititgada? Purtà accusaziun ha Corina Collenberg, la procuratura publica responsabla. Il portal «Inside Justiz» ha fatg enconuschent il cas avant dus onns ed ha crititgà las examinaziuns da la procura publica grischuna. Lezza haja per exempel tralaschà da confiscar il telefonin ed il computer da l’inculpà. Ils protocols da chat sin skype che documentassan, co ch’il derschader haja emnas a la lunga persequità la praticanta, na sajan betg vegnids segirads a moda ch’els valessan sco cumprova avant dretgira.
