Concret vai per var 100 fin 200 plazzas da lavur che la Hamilton vegn a spustar en ils Stadis Unids. Quai è ina reacziun directa sin ils dazis ch'ils Stadis Unids han annunzià la gievgia d'introdurcir. Per ils products da la Svizra duain valair a partir dals 9 d'avrigl dazis da 31%.
Jau sun stà fitg surprais da l'autezza dals dazis. Sur 30% … quai è nar.
Tenor Andreas Wieland stoppian ins producir ils products per ils Stadis Unids al lieu. Ins na possia betg sa prestar dad esser 30% pli char che la concurrenza. Perquai vegnan ins a spustar var 100 fin 200 plazzas. Tscherts products vegnan en l'avegnir be pli producids surmar.
Speranza da pudair cumpensar senza relaschadas
La Hamilton ha dapi il 1966 in lieu a Panaduz. Quai era l'emprim lieu ordaifer dals Stadis Unids. Pli che 1'700 persunas han là ed al lieu da producziun a Domat lur lieu da lavur – circa medem blera glieud lavura actualmain per la Hamilton en ils Stadis Unids. Che 200 plazzas da lavur stoppian ir en ils Stadis Unids saja donn, di Andreas Wieland. Il Grischun haja numnadamain bler potenzial.
Ina buna nova dettia dentant era. Tar ils products da «medical» saja la Hamilton creschida l'onn passà per passa 30%. Perquai speran ins da pudair cumpensar in tant almain senza stuair relaschar persunal. Las persunas che lavurassan en las plazzas da lavur che vegnan spustadas sa fatschentian en l'avegnir dals 30% dapli lavur ch'ins haja, spera Wieland.
Adattà al tema
Sco producent da products da sanadad ha la Hamilton pudì profitar surtut durant la pandemia da corona.