Gronds donns, dentant tuttina positiv – quai è l’onn da gestiun 2024 stà per l’Assicuranza d'edifizis dal Grischun (GVG). Cun ils donns assicurads vi d'edifizis da 28,7 milliuns francs sajan stadas las prestaziuns da donns 2024 cleramain sur la media da 10 onns. Ils martgads da finanzas èn sa sviluppads a moda positiva, quai che chaschunia in gudogn d'investiziuns da finanzas da 58,7 milliuns francs. La GVG haja reservas da chapital solidas ed è vinavant abla da supportar gronds donns, scriva l'assicuranza a chaschun da la preschentaziun dal resultat annual.
2005 hai dà pli gronds donns
Las grevas malauras durant la stad en la Val Mesauc ed en autras parts dal chantun han custà bler. Tut en tut muntia la summa dals donns a 28,7 milliuns francs. 13,8 milliuns francs da quels resultan da donns da fieu e 14,9 milliuns da donns elementars. L'ultima giada hai dà l'onn 2005 ina summa da donns pli gronda.
Or da l'archiv:
Il martgà da finanzas è sa sviluppà positivamain l'onn 2024. Il gudogn sin la facultad d'investiziun da la GVG munta 58,7 milliuns francs; quai correspunda ad ina rendita totala da 7,95 %. Ils gudogns che vegnan realisads cun investiziuns da chapital cuvran la perdita operativa da 14,8 milliuns.
Malgrà la gronda perdita entras pajaments da donns, haja dà in resultat positiv. Sut il stritg sa resulta in gudogna da passa 30 milliuns francs.
