En il Grischun èn ils donns vi da bajetgs stads cun 15 milliuns francs 28% sut la media dals ultims onns. Era sch'ils custs sajan stads pli bass – saja il dumber da donns restà pli u main tuttina sco ils ultims onns – declara Marc Handlery, il directur da l'assicuranza:
Nus avain gì blers pitschens donns che n'eran betg uschè chars.
Grazia al svilup positiv sin ils martgads da finanzas han ins realisà ina rendita da la facultad d'investiziun da passa 5,5 %. Uschia han las perditas a la bursa da l'onn precedent pudì vegnir gulivadas per gronda part e las retenziuns da mira han puspè pudì vegnir cuvridas per 96,6 %. Sut il stritg resultia in gudogn dad 8’000 francs. Quai suenter ina perdita da passa 50 milliuns francs l’onn avant. Contribuì a quest resultat legraivel hajan surtut er gudogns sin investiziuns a la bursa.
Las clientas ed ils clients da l'Assicuranza d'edifizis dal Grischun pajan las pli bassas premias da la Svizra. Quai haja surtut da far cun il fatg, ch'i n'haja en il Grischun betg dà gronds donns ils ultims onns. Per il cas da donns pli gronds ha la GVG reservas finanzialas enta maun, cun qualas ils donns d'enfin 4 eveniments gronds pudessan vegnir finanziads .
La midada dal clima ans pudess purtar novas situaziuns extremas.
L'Assicuranza d'edifizis dal Grischun investescha ensemen cun las autras assicuranzas d'edifizis da la Svizra en la perscrutaziun per pudair valitar, tge privels da la natira ch'i pudess dar en l'avegnir. Ultra da quai ha la GVG sin fundament da la buna interacziun tranter prevenziun, pumpiers ed assicuranza fixà sias prioritads strategicas per il futur. En il center stattan qua il rinforzament dals process orientads a la clientella sco er ulteriurs pass da digitalisaziun. L'introducziun d'ina nova software en il sectur da la protecziun cunter incendis e da la prevenziun da donns elementars è in term impurtant sin questa via.