La pesta da portgs africana è ina malsogna virala che pertutga portgs selvadis, dentant er portgs domestics. 95% dals animals moran entaifer paucs dis. Per l'uman n'è il virus betg privlus. Igl avess dentant consequenzas per la protecziun d'animals e per l'economia. Territoris pertutgads na pon betg exportar charn-portg. Plinavant vala in scumond da chatscha e restricziuns per entrar en il guaud.
Impressiun da la simulaziun
-
Bild 1 von 5. Chattar ils animals, controllar ed analisar els, e pli tard dismetter il cadavers correctamain tutga tar las incumbensas. Bildquelle: RTR.
-
Bild 2 von 5. Bildquelle: Chantun Grischun.
-
Bild 3 von 5. Bildquelle: Chantun Grischun.
-
Bild 4 von 5. Bildquelle: Chantun Grischun.
-
Bild 5 von 5. Bildquelle: Chantun Grischun.
Per guardar sch'il chantun fiss pront per uschia ina pandemia, ha l'Uffizi chantunal per segirezza da victualias e sanadad d'animals ensemen cun l'Uffizi da militar da protecziun civila simulà quel scenari. Durant 5 dis han a Grono gì lieu la simulaziun per tranter auter exercitar ed examinar la collavuraziun, las sfidas logisticas e las resursas.
Chantun è cuntent cun l'exercizi
Sco ch'il Chantun scriva, sajan ins cuntent cun il resultat. Tut las persunas participadas hajan dumagnà lur incumbensas. Er la collavuraziun tranter autoritads, gruppas da lavur e persunas voluntarias haja funcziunà bain. Impurtant saja surtut da reagir svelt. Uschia possian ins er evitar ina derasaziun – u silmain sminuir quella. Plinavant possian ins cun uschè exercizis bajegiar si rutina. Las experientschas sajan impurtantas per il cas serius.
Plinavant possian ins sensibilisar il tema da la malsogna. Perquai ha la simulaziun er gì lieu a Grono, ina regiun che fiss en cas d'ina pandemia pertutgada sco emprima en in Grischun.
Nua en Europa datti gia cas da la pesta da portgs?
Tenor il bulletin actual da radar dal BLV hai il favrer 2025 en spezial dà cas da portgs da chasa en Rumenia, en l'Ucraina ed en l'Europa dal Sid – però be singuls cas. Ils portgs selvadis hai tutgà pli fitg: la Pologna ha annunzà passa 800 cas, la Germania bundant 300 cas. In fatg che fa quitads a la Svizra è ch'adina dapli cas vegnan annunziads en l'Italia dal nord: Ils cas ils pli datiers èn stads al vest da Milaun en il Piemont ed en la Lumbardia. «Il privel per la Svizra è pervi da quai il pli grond en il Tessin ed il sid dal Grischun», ha ditg Martin Reist, il manader per la sanadad e la protecziun dals animals, envers SRF.
Adattà al tema
Adina pli fitg arrivan ils portgs selvadis en las valladas dal sid. Quai chaschuna ina u l'autra sfida.