Il portg selvadi – ch'ina camera zuppada aveva trapplà la fin dal november passà tar Zernez sin bun 1'800 meter sur mar – ha sco para decidì da restar en l'Engiadina. En il cunturn da Tschlin saja quel vegnì observà differentas giadas durant quest enviern – e dacurt haja il visitader exotic era stgavà pliras pradas datiers dal vitg. Tenor l'Inspecturat da chatscha e pestga dal chantun Grischun saja quai ina surpraisa, ch'il portg ha decidì da restar e cunzunt ch'el haja survivì l'enviern. Il november eran ils experts anc da l'opiniun ch'i saja improbabel ch'el restia en la regiun durant l'enviern lung e brut.
Nus n'avain veramain betg quintà ch'il portg salvadi restia en l'Engiadina Bassa u ch'el survivia l'enviern. Forsa è quai stà pussaivel pervi da l'enviern plitost miaivel, ma tuttina – ina supraisa!
Il visitader exotic procura betg be per legria
Tenor Lukas Walser, manader da l'Inspecturat da chatscha e pestga grischun, sa tractia d'in mastgel giuven. El pensa che l'animal a Tschlin saja il medem portg selvadi ch'è gia vegnì filmà per l'emprima giada il november passà ed ha cunquai procurà per ina premiera en l'Engiadina. Co ch'il portg selvadi è veramain arrivà en l'Engiadina na pon ils experts betg declerar. Pussaivel saja per exempel che l'animal saja vegnì da Val Müstair, da la Bregalia u da Livigno. Il visitader haja dentant era cumenzà a sa far pli preschent: l'emna passada hajan purs da Tschlin scuvrì donns sin las pradas ordaifer dal vitg. Questas pradas sa chattian sper ina senda da spassegiar en direcziun da Vnà. Ils purs han alura annunzià ils donns al guardiaselvaschina.
Sch'il portg selvadi resta qua e stgava vinavant, dess quai segir era donns pli gronds per mai.
Ils purs survegnan grazia a l'annunzia ina compensaziun per las uras ch'i drova per puspè metter en urden las pradas. Quai stgavim saja fitg tipic per portgs selvadis durant la primavaira. Per regla tschertgian quels da quest temp organissems en il terren – cunzunt verms da plievgia, declera Lukas Walser. Il terren umid da la primavaira vegnian quests organissems puspè en rasadas da terra pli autas. L'Inspecturat da chatscha e pestga grischun vegnia vinavant ad observar las acitivitads dal portg selvadi. En cas ch'i dat blers donns steppian ins evaluar mesiras pussiblas – ed en il mender cas schizunt sajettar quel, cunquai che gliez è lubì en il chantun Grischun, declara Lukas Walser.
Da far ina prognosa sch'il visitader exotic vegn er anc ad esser en l'Engiadina Bassa durant la stad saja fitg difficil. Ins stoppia guardar.
Ina pitschna sensaziun: emprim portg selvadi en l'Engiadina
Tenor l'Uffizi da chatscha chantunal è vegnì filmà la fin da november in portg selvadi masculin a Zernez sin bunamain 1'800 meters sur mar. En l'Engiadina è quai ina premiera. Il guardiaselvaschina Guolf Denoth da Zernez manegia ch'i saja bain pussaivel che portgs selvadis hajan traversà l’Engiadina gia pli baud, senza ch'insatgi haja badà insatge. Ils davos onns haja dà in grond boom da cameras d’observaziun da selvaschina ed uschia ves’ins ussa chaussas novas.
Populaziun en las valladas dal sid
Las circumstanzas da viver èn perencunter bunas en las valladas dal sid. Uschia ha RTR rapportà il 2022 che la populaziun da portgs selvadis crescha en il Puschlav e la Mesolcina e chaschuna er donns. Plinavant pon ils portgs era derasar malsognas.
