Dal chaschiel savurus e la charn gustusa fin al mel d'avieuls aromatic – il Grischun è il dachasa d'ina vasta cultura culinarica. Da chattar products regiunals ed integrar quels en la gastronomia n'è fin uss dentant betg adina stà uschè simpel. Quai vul l'uniun Grischun Viva midar cun trais novas iniziativas.
In viadi culinaric tras il Grischun
Grischun Viva ha creà in nov guid per viadis culinarics tras il Grischun. Quel pon ins empustar online gratuitamain. L'idea saja da laschar scuvrir indigens sco era visitaders u visitadras la culinarica da las differentas regiuns dal Grischun. En il focus da la terza ediziun stat il chaschiel. Il guid dat orientaziun davart produzents e produzentas localas, infurmescha davart tipicas sorts caschiel da la regiun e presenta hotspots culinarics en differents lieus dal chantun – da chascharia tradiziunalas fin modernas
Era per indigens datti da scuvrir chaussas novas ch'ins n'ha anc betg enconuschì enfin uss. Saja quai butias sin il bain puril, chascharias, ustarias u autras stizuns. Tenor Leonie Liesch dettia en il Grischun tantas purschidas culinaricas ch'ins na sappia insumma enconuscher tuts.
Jau sun persvadì ch'er els scuvran novas sorts da chaschiel indigenas, dals quals ins na saveva gnanc ch'els vegnan producids era en il Grischun.
Il cudeschet cumenza cun ina introducziun perper quels che na san betg bler davart caschiel. En 16 paginas vegn declerà la savida da basa e preschentà cun graficas. Da l'istorgia dal chaschiel, sur ils differents chaschiels dal Grischun fin al process da la producziun survegn'ins infurmaziuns interessantas e tips pratics.
Products regiunals èn il cor da l'entira chaussa. Las spassegiadas u las turas cun il velo èn vegnidas construidas enturn las purschidas, uschia ch'ins vegn en contact cun products regiunals e ecologics.
Cumpass culinaric ed il manual per regiunalitad : colliar produzents e gastronoms
In ulteriur project da Grischa Viva è l'uschenumnà «cumpass culinaric grischun». I sa tracta d'ina plattafurma digitala che duai far pli simpel a produzents regiunals e manaschis da gastronomia da chattar in l'auter – per exempel sch'in gastronom tschertga products regiunals u sch'in planisader d'events vul engaschar in produzent local per la proxima occurenza. La plattafurma dat ina survista davart l'offerta culinarica dal Grischun.